Milan tan chak a ngai

Zanin dar 12:30-ah Milan derby hmuhnawm en tur a awm leh dawn ta - Inter Milan chuan Champions League semifinal second leg-ah AC Milan an mikhual dawn.

Team pahnih intawn hmasakah Inter-in 2-0 in hnehna an chang a, AC Milan tan tlang turin si thum fai taka chak a ngai dawn tihna a ni.

Mahse, hetiang taka game pawimawh an hmachhawn hmaa an league match hnuhnung berah team vantlang Spezia chu 2-0 in an ngam lo a, 'puja' fuh loh lai tak a ni.

Heti chung hian Milan boss Stefano Pioli erawh a zam lo a, season hmasa Serie A-a Milan champion puitu chuan, "League-a kan dinhmunte ngaihtuah chuan, zanin kan inkhel tur hi tun season-a kan match pawimawh ber a ni hial ang.

"A ṭha thei ang bera kan khelh a ṭul tih kan hria a, Inter hi kan hneh thei a ni tih ring chunga inkhel kan hmachhawn a ṭul. Inter kan hneh chuan season thara Champions League khel tur pawhin kan dinhmun a ṭha sawt ang. Khelh ṭhat a ngai a, chance kan nei bawk," a ti a, Inter hneh theih a inbeisei.

Milan tan forward Rafael Leao inlan theih dawn leh dawn loh a la chiang lo a, tawnhriat nei ṭha Olivier Giroud leh Brahim Díaz te tlarhmaah an pawimawh dawn tihna a ni.

Italian media ṭhenkhat tarlan dan chuan Inter-in goal hnih nei sa mah se coach Simone Inzaghi chuan him dam taka khelh ai chuan, a tir aṭanga Milan nawr a tum dawn niin an sawi - inkhel a hmuhnawm dawn.

Inter hian tlarhmaa khel turin Lautaro Martinez, Edin Dzeko leh Romelu Lukaku te ho an nei a, anni thlawp turin Nicolò Barella leh Henrikh Mkhitaryan te an la nei cheu bawk. Inzaghi-a'n first leg-a bul ṭan ngai bul a ṭantir dawn nia sawi a ni a, chuti a nih chuan Lukaku tan bench luahlum leh phawt a ngai dawn a nih hmel.

Inter assistant coach Massimiliano Farris chuan an coach Inzaghi fakin, "Simone hian beidawng lo turin min fuih fo a, kan inpuitawn a ni. Champions League match hmasa bera Bayern Munich kan ngam loh khan, tam tak chuan kan chhe ta vekah an ngai. Mahse, Simone-a'n, 'Barcelona lakah kan ti thei ang, theihtawp chhuah ang,' a ti a, kan European zinkawng chu kan zawh ṭan ta a ni," a ti - zaninah pawh inrintawkna nen an inlan ang.

Inter hian Bayern hi vawi hnih ngam lo mah se Barca nen an intawn vawi hnihah point li an hlawh chhuak a, Viktoria Plzen laka point ruk hmu bawkin, group of death ang hiala sawi chu an paltlang a ni.