Conference Finals khel tur a hriat kim

Jayson Tatum awmna Boston Celtics chuan Pathianni zan khan Philadelphia 76ers chu 112-88 in an hneh a, best of seven series chu 4-3 a lain NBA Eastern Conference finals an lut.

Boston Celtics an chak theih nan hian Tatum chuan point 51 a nei, tun thlatir lama Golden State point guard Stephen Curry-a'n Sacramento Kings lakah point 50 a neih record chu a rawn khum nghal.

Point a neih hnem bakah rebound vawi 13 a la a, assist ṭum nga nei bawkin hnehna an chan theih nan a thawhhlawk hle. Conference finals-ah chuan season hmasa lama an hneh Miami Heat an hmachhawn leh dawn a ni.

Celtics hian Sixers thiampuipa Joel Embiid an veng uluk hle a, NBA Most Valuable Player chawimawina dawngtu hi point 15 bak an neihtir lo - Boston player ṭha pakhat Jaylen Brown erawhin point 25 a nei phak thung.

Tatum chuan, "A nihna takah chuan kan match hmasa zawkah ka khel ṭha lo a, tun ṭumah pawh hian first half chu ka khel ṭha lo bawk, a hnu lama ka tho chhuak thei kha ka lawm takzet a ni," a ti.