T20 C'ship-ah Chhinga Veng an champion

Cricket Association of Mizoram (CAM) buatsaih T20 Championship hmasa berah Chhinga Veng CC chuan an veng ṭhenawm Armed Veng CC chu nimin khan Lammualah 113 runs a hnehin an champion. Chhinga Veng champion puitu Jehu Anderson chu final-a man of the match-a thlan a nih bakah best batsman-a thlan a ni.

Inelna kalhmang

CAM hnuaiah hian division pathum a awm a, hei bakah hian non-league a la awm bawk. Division sang ber first division-a ti ṭha pali Zarkawt Lords, Kulikawn CC, Ramhlun Venglai CC leh Gorkha CC ten multi day inelna hmangin CAM Cup an khel a, CAM Cup-ah Ramhlun Venglai CC an champion.

Tun ṭuma T20 Championship-ah hian first division team pariat zinga a hnuai lama awm pali Chhinga Veng CC, Armed Veng CC, Chanmarians CC leh Gladiators CC (Ramthar Veng) bakah Second Division club pariat an tel.

Second Division club pariatte chu Legends CC, Pacers CC, Durtlang CC, Venghnuai Raiders CC, Luangmual CC, Hunthar CC, Zemabawk Pitchers CC, ILMOV CC leh Bawngkawn South CC te an ni.

Final chu

Ṭhumvawrah Chhinga Veng an vannei a, bat hmasak an thlang. T20 cricket a nih angin over 20 chauh a ni a, ground khelhna a zim bawk avangin run a chhuak tam bawk.

Chhinga Veng batter Jehu Anderson-a'n ball 44 lekah 93 runs a siam a, Dawrpui Vengthar tlangval Anderson bakah Dawrpui tlangval Lalhmangaiha'n ball 37-ah 72 runs a siam bawk. Mizoram team-a hmun nghet chang pahnih zarah Chhinga Vengin 247 runs an siam.

T20 atan chuan Armed Veng tan target a sang mah mah a, Chhinga Veng leg spinner Moses Ramhlunmawia leh off spinner Rosiamliana Ralte Jr te bowling lamah an chet ṭhat avangin Armed Veng an tho chhuak zo lo. Armed Veng hian 114 runs chauhin an chhanglet a, team changtlung zawk Chhinga Veng 113 runs-in an chak.