A vawi hnih nan Bezzecchi a chak

Marco Bezzecchi chuan tun season MotoGP huangah a vawi hnih nan hnehna a chang a, Ducati rider hian championship lamah pawh hmahruaitu leh a teammate ni bawk Francesco Bagnaia a phak lohna chu point khat chauh a ni ta.

Inrinnia Sprint Race an neihah Jorge Martin a tlan chak ber. Pathianniah intlansiak pangngai nei zuiin, pathumna aṭanga tlan ṭan Bezzecchi chu Martin hmaah thlengin a tlan chak ber.

Tualchhung tlangval Johann Zarco chu dawhsan (podium) lawn phak chinah chiah a awm bawk a, champion lai Bagnaia erawh Aprilia rider Maverick Vinales nen an intihpalh hnuah a tlan tluan ve thei tawh lo.

Hnehna changtu Bezzecchi hi nikum kumtirah khan chuan Moto2 huangah a la inlan, thla hmasa khan Argentine Grand Prix-ah bike intlansiakna sang ber hi a hmachhawn a, tunah chuan mumang ramah a cheng mek.

Bezzecchi chuan, "A makin a ropui ngei mai. Nuam ti leh ka ṭhat dan taka tlan tawp mai kha ka tum a, ka tihlawhtling thei kha a lawmawm. Bike ṭha tak nen chuan hnathawh a nuamin a awlsam," a ti.

MotoGP vawi ruk champion tawh Marc Marquez-a'n qualifying a tlan ṭha a, intlansiak takah pawh pahnihna aṭangin a tlan ṭan. Mahse, tun season intlansiak hmasa bera chesual tawh hi a la che fuh hleithei lo.

Lap hnih chauh tlan hmabak a awm tawh tihah Marquez hi a chesual a, inelna a hmachhawn tluan thei lo a, a tan champion nomawi beisei ngam chi a ni tawh lo ang.

Khawvela bike intlansiakna sang ber leh ngaihhlut ber hi June 11, Pathianni hian Italian Grand Prix an tlan leh ang. Ruahman dan chuan kumin tawp lamah Indian Grand Prix pawh tlan a ni dawn.