Chelsea-in FA Cup nomawi an chawi

16th May, 2023

Chelsea FC mipa team-in beisei pha lo mah se hmeichhe team erawhin Sam Kerr an kawl a, Pathianni zan khan FA Cup final-ah Manchester United 1-0 a hnehin an champion. Goal awmchhun hi minute 68-naah Australian forward Kerr-i khung a ni.

Wembley Stadium-ah Man United-in bul an ṭan ṭha zawk a, second 20 lekah Leah Galton-i hmangin goal hmahruai khungah an inngai, mah se Ella Toone-i a offside avangin pawm a ni lo. Inkhel boruak a ṭang a, goal chance pawh a tam.

A tawpah erawh goal khung thei bik player chu team pahnih danglamna a ni a, hmeichhe striker ṭha ber zinga mi Kerr-i chuan minute 68-naah Pernille Harder cross chu goal-ah a chantir.

Chelsea-in tun hnaiah hmeichhe FA Cup an thunun a, tun ṭum hi an vawi nga champion-na a nih bakah a zawna vawi thum an champion-na a ni bawk. Chutihrualin Arsenal hmeichhe team chu champion ngun ber an ni a, vawi 14 zet an champion tawh a ni.