Harsa takin Djokovic a chak

Novak Djokovic tan meuh pawh match zawng zawng hi a awlsam bik ṭhin lo. Serbian star hian Pathianni zan khan a khingpui Grigor Dimitrov chu 6-3, 4-6, 6-1 a hnehin Italian Open last 16 a inhlangkai.

Rome khawpuiah hian Djokovic hi vawi ruk a champion tawh, kuminah hian rinkai ni mah se a match hmasa berah Tomas Etcheverry a hneh awlsam lo a, match hnihnaah pawh a ṭhat dan berin a la khel chhuak thei rih lo.

Mahse, Grand Slam vawi 22 champion tawh Djokovic hi a khel ṭha tawk lo chungin a chak zel rih tho a, a match lehpekah chuan Cameron Norrie a hmachhawn leh dawn a ni.

British number 1 hian inkhel dangah Marton Fucsovics chu 6-2, 7-6 (7-4) in a lo hneh ve thung a, last 16-ah inkhel hmuhnawm an chhawpchhuak chhunzawm ngeiin a rinawm.

Kum 35 mi Djokovic chuan, "A awlsam lo ve a ni, a nihna takah chuan tournament ṭan hma hian Roma khawpuia clay court-ah hian ka inkhel chhin lo, chuvangin inelna tak hmachhawn a harsat phah," a ti.

Hmeichhe inelna lamah Coco Gauff chu Marie Bouzkova lakah 4-6, 6-2, 6-2 in a chak lo a, world number 6 Maria Sakkari pawhin Marketa Vondrousova chu 7-5, 6-3 in a hneh lo bawk.

World number 1 hlui Victoria Azarenka chu a ke hliam vangin a inhnukdawk bawk a, inelna neih laiah hian hmeichhe ranking sang zual 10 chin player paruk chu an tla tawh tihna a ni.

Number 1 Iga Swiatek erawhin last 16 a lut tawh a, Polish nula hian nizan zanlai khan seeded 21-na Donna Vekic hmachhawnin result kan hre hman lo - United States nula Madison Keys pawh a thiam zual 16 zingah a inhlangkai bawk.