Pogba a inhliam leh tawh!

Paul Pogba chuan kum khat chuang hnuah inkhel pangngaiah bul a ṭan ve leh a, mahse minute 24 chhung bak a inkhel thei lo. Juventus midfielder hi hliam vanga lak chhuah a ngai.

Pathianni zan khan Juventus chuan an mikhual Cremonese 2-0 in an hneh. Allianz Stadium-ah Pogba hi inkhel bul ṭantu zingah a tel a, mahse ball a cross laiin a malpui vei lam a hliam a, a inkhel zui ve thei tawh lo.

France international hian season hmasa khan Manchester United tana a contract a hmang zo a, a thlawnin Old Lady hi a pan. Season inbuatsaihna an neih laiin a inhliam a, hun rei tak a inkhel thei lo zui.

Tunah a dam pangngai chho ve leh chiah a, hliam dangin a tlak buak - engtiang chena rei nge a chawlh dawn hriat a la ni lo. Pogba hliam zan hian Juve tan Nicolo Fagioli leh Bremer te chuan goal khat ve ve an khung.

Juve manager Massimiliano Allegri chuan, "A hliam a dam leh theih nan theihtawp a chhuah a, chumi hnuah a dam ve leh ta chiah a, tunah a hliam leh hi pawi kan tihpui takzet a ni," a ti.

Hnehna an chan avangin Juventus hi Serie A table-ah pahnihnaa an awmhmun an sawhnghet a, league bakah Europa League semifinal second leg khelh hmabak an la nei bawk.

Chak lo Cremonese erawh a hniam ber dawtah an awm chhunzawm, a him china awm Spezia aia an hniamna chu point ruk a ni - match khelh hmabak pathum chauh a awm tawh avangin Sampdoria hnung zuiin an tlak ngei a rinawm.

Pathianni zan inkhel dangah AS Roma chu Bologna nen 0-0 in an inhnehtawk. Roma manager Jose Mourinho-a'n Europa League semifinal a ngaipawimawh a, a player neih ṭhat ber a chhawp chhuak lo.

Europa Conference League champion hian Europa League nomawi chawi leh an tum, semifinal first leg-ah Bayer Leverkusen nen 1-1 in an inhnehtawk. Ningani zana second leg an khelh tur atan an indah ṭha a ni.