RB Leipzig-in Werder Bremen an lehthal

Bundesliga-ah RB Leipzig chuan pathumna dinhmun luah turin Pathianni zan khan Werder Bremen an lehthal a, 2-1 in hnehna an chang. Season thara Champions League khel turin Leizpig hian match hnih khelhah point thum chauh an mamawh tawh a, chutihrualin Allianz Arena-ah Bayern Munich an hmachhawn dawn avangin tun ṭuma hnehna an chan hi a hlu hle.

Red Bull Arena-ah first half-ah goal a lut lo a, minute 70-naah Leonardo Bittencourt hmangin Werder Bremen-in goal an khung. Leipzig-in an nawr na a, hun tawp lamah Bremen an talbuai. Minute 87-naah Christopher Nkunku cross chu Willi Orban-a'n a tauh goal a, Leipzig an phur sawt.

Injury time-ah pawh minute ruknaah Nkunku-a'n mual sir aṭangin ṭha zetin a khalh lut a, a ball pek chu Dominik Szoboszlai-a'n awlsam takin a khung. Leizpig-in 2-1 in hnehna an chang a, Union Berlin (59 points) khumin pathumnaah an awm theih phah.

Inkhel dangah Bayer Lever-kusen leh VfB Stuttgart te 1-1 in an inhnehtawk. Xabi Alonso hote hian point 49 an hmu a, pasarihnaah awmin paruknaa awm Wolfsburg nen an point hmuh zat a inang.