Playoff inchuh boruak a sang zel

Indian Premier League-ah playoff khel tur hriatthiam a la har hle. Pathianni zan khan Kolkata Knight Riders chuan khualmualah pahnihna dinhmun luahtu Chennai Super Kings chu wicket rukin an hneh a, playoff khelh beiseina an la nei zel.

MA Chidambaram Stadium-ah mualneitu Chennai-in bat hmasak an thlang a, bul ṭan chhe lo mah se Ruturaj Gaikwad (17), Devon Conway (30) leh Ajinkya Rahane (16) te thih hnuah Ambati Rayudu (4) leh Moeen Ali (1) te run tam siam loin an thi.

Shivam Dube (48*) leh Ravindra Jadeja (20) te hun rei tak an inkawp a, Jadeja 'strike rate' a ṭha tawk lo. Over tawp berah Jadeja 'out' mah se MS Dhoni a luh dawn avangin mipui an lawm hial a, CSK captain hian beisei erawh a pha lo - ball thumah run hnih chauh a siam.

CSK-in over 20-ah 144 runs chauh an siam thei a, KKR top order lam che ṭha lo mah se middle order-a awm captain Nitish Rana (57*) leh Rinku Singh (54) ten team an chakpui. Over 18.3-ah KKR hian 147/4 runs siamin target an umpha a ni.

IPL-ah hian team 10 an awm a, league round zawh nan team tinin match hnih khat bak khelh an mamawh tawh lo. Chutichung chuan Delhi Capitals chauhin playoff khelh beiseina an nei tawh lo a, inelna a la hmuhnawm chho zel ang.