Basketball thiam ber veng Ramhlun North

Chhinga Veng Branch YMA buatsaih Thanpari Pautu Memorial Inter Branch YMA Basketball Tournament-ah Ramhlun North an champion. Inelna hi MBBA leh CYMA hriatpui a ni a, final-ah Ramhlun North hian Khatla South chu 85-77 in an hneh.

Thawhṭanni zan khan Hawla Indoor Stadium-ah mipui an khat vek a, hall-ah mipui an len loh avangin a chhunga awm pawh chhuah an phal tawh lo. Champion tur a chian hnuah chauh mipui luh an phal a, Chhinga Vengin an branch Diamond Jubilee puala inelna an buatsaih a hlawhtling hle.

Dream Final

Inelna ṭantirhah chuan Khatla South leh Ramhlun North te hi final atana duthusam a ni lo mai thei, mahse heng branch YMA pahnih hian final duhthusam an khel thung.

Champion tura rinkai zawk Khatla South-in bul an ṭan ṭha a, MSL Rookie of the Season-a thlan Lalhmachhuana'n first quarter-ah ringawt point 10 a nei tawh. Khatla South-in Ramhlun North lakah 22-19 in hma an hruai.

Mahse, Ramhlun North an khel ṭha rual. Second quarter-ah Hmachhuana an veng ṭha a, RD Vanlalhmangaiha (Tabawiha) a rawn che ṭha ve bawk. Halftime-ah Khatla South-in 40-38 chauhin hma an hruai a, Ramhlun North tan Tabawiha'n hun chanve hma lamah hian point kua a nei hman.

Zarkawt BCA coach hlui Liansangpuia'n halftime laiin a team enkawl Ramhlun North a fuih ṭha a, third quarter-ah danglamna a lang. Tabawiha bawk a che ṭha a, quarter thumnaah hian three ṭum thum a lut a, point 11 ngawt a nei. Ramhlun North-in third quarter-ah 26-21 in an hneh a, quarter khat chauh khelh tur a awm tihin 64-57 in hma an hruai ta zawk.

Quarter tawp berah Ramhlun North-in an hmahruaina an humhim a, MVP-a thlan Malsawmtluanga'n offensive rebound a la ṭha thei a; tawnhriat nei ṭha Michael F.Lalawmpuia leh Lalruatpuia te hun pawimawhah an ṭangkai bawk. Ramhlun North-in Khatla South lakah 85-77 in hnehna an chang.

Hun bik chu

Ramhlun North-in MBBA hriatpui veng inelnaah nomawi an chawi a, Hawla Indoor Stadium aṭanga RSC Field thleng kawng an zawh a, vengchhung mipui pawhin an ṭawiawm ṭha hle.

RSC Field-ah hian player-te chawimawina hun an hman bakah, Pathian hnenah lawmthu an sawi. Coach Liansangpuia chuan, "Naupang lo tihpui ṭang ṭang ṭhin Mike-a (Michael F-a), Lana, Mapuia Zote (assistant coach) leh U Mathlantea (Bialtu MLA) te ho thawhrah leh ṭawngṭaina vang liau liauin kan champion-ah ka ngai.

"Kum 2015 khan Inter Veng Branch YMA Final-ah Ramhlun North ka enkawl ṭum tho hian Khatla South hi point khatin kan hneh tawh lo. A vawi khat nana Inter Veng Branch YMA inelnaa kan champion hi ka lawm hle," tiin Vanglaini a hrilh.