Aizawl Grassroots Centre an champion

Mizoram Under 15 League final-ah Aizawl Grassroots Centre chuan Lungdai club Nancy FA chu 6-0 a sawpin an champion.

Under 15 League ṭum thum neihna a ni a, inelna hmasa pahnihah Tata Trusts COE-te champion an ni.

Aizawl Grassroot Centre coach C. Lallawmzuala chuan, "Thingtlang aṭanga Aizawla luta football khel ka ni a, Under 15 League pawh hi Mizoram inelna a nih angin thingtlang naupangten hmang ṭangkai se ka duh. Hemi avang hian Hnahthial (4), Lengpui (2) leh Vairengte (1) aṭangin player kan nei a, kan squad ṭhat hi kan chakna a ni.

"Hei bakah hian nu leh pa te ka fak a, an fate an ṭawiawm ṭha hle. Hun rei tak inelna kan nei a, a tawp thlengin min ṭawiawm ṭha a ni," tiin Vanglaini a hrilh. Lawma hi Thingsai khua niin Shillong Lajong leh Royal Wahingdoh bakah Aizawl FC-ah te a khel tawh a ni.

Best player Vanlalṭhazuala, AGC hi Mizo footballer langsar Rohmingthanga, Lengpui fapa a ni.

Mizoram Under 15 League-ah hian team paruk Aizawl Grassroots Centre, Nancy FA, FC Kulikawn, Beck's FA (Tanhril), Grace Academy (Sihphir) leh Vaivakawn FC te an inel a, vawi hnih ṭheuh an inkhelhchhuah hnuah a sang pahnihin final hi an khel a ni.