Australia-ah Remsiami telna India

Indian hmeichhe hockey team chu Asian Games khel turin an inbuatsaih mek a, intuaihriam turin Australia ramah an zin. Mizo nula Lalremsiami Hmar chu India tana fehchhuak zingah hian a tel.

Remsiami telna India team hian Australia ram an thleng tawh a, tun ṭuma an feh chhuahah hian match vawi nga an khel dawn. May 18-27 chhung inbuatsaihna hun hi an hmang dawn a ni.

Indian rama hockey thuneitu sang ber Hockey India chuan Asian Games khelh tur hi a ngaipawimawh a, player thlan bikte hi April thlatir khan a tar chhuak daih tawh a, chumi hnuah SAI, Bengaluru-ah thla khat chuang training an lo nei tawh bawk.

Vanglaini zawhna chhangin Remsiami chuan, "Inbuatsaihna kan nei ṭha a, tuna kan zin chhuah hian taksa leh rilru lamah nasa lehzuala min chher hriam theih kan beisei," a ti a, an zinna Australia chu tun dinhmunah a vawt hle tih a sawi bawk.

Tun dinhmunah India nulate hi world ranking-ah pariatna an ni mek a, an hmachhawn tur Asutralia hi pathumna an ni thung. Tournament inbuatsaihna a nih avangin mahni aia ranking sang hmachhawn hi thil ṭha tak a ni ngei ang.

Indian team chief coach Janneke Schopman chuan, "Australia rama anmahni team ngei hmachhawn chuan nasa takin min pui ngei ang, anni hi khawvelah chuan a ṭha berte zinga mi an ni phak," tiin a sawi.

Asian Games khel tura thlan zingah hian India captain hlui Rani Rampal chu koh a ni lo a, hei vang hian tlarhma lamah Mizo nula, Thenzawl Hockey Training Center aṭanga inzir chhuak Remsiami mawhphurna a sang leh zual dawn.

Kolasib nula Siami hian kum 23 mi chauh ni chungin India tan match 106 a khel tawh a, goal 29 a khungsak tawh bawk. Match tam takah midfielder atan hman a ni ṭhin a, chutichung chuan goal pawh a khung hnem tawh - Australia lakah rinrawl a ni dawn.

India goalkeeper Savita Punia chu captain a ni leh dawn a, ani kaihhruaina hnuaiah hian nikum khan Birmingham Commonwealth Games-ah bronze medal an lo la tawh a, FIH Nations Cup-ah an champion avangin FIH Hockey Pro League 2023-24 atan an tling tawh bawk.

India tan Asian Games an khelh tur hi a pawimawh dawn. China khawpui pakhat Hangzhou-a neih turah hian an champion thei a nih chuan qualifying khelh ngai loin Paris Olympic 2024 atan an tling nghal dawn - chuvangin Australia rama inbuatsaihna hi a pawimawh hle.

Indian Squad:

Goalkeepers: Savita, Rajani Etimarpu, Bichu Devi Kharibam, Bansari Solanki.

Defenders: Deep Grace Ekka, Gurjit Kaur, Nikki Pradhan, Udita, Ishika Chaudhary, Akshata Abaso Dhekale, Jyoti Chhetri, Mahima Chaudhary.

Midfielders: Nisha, Salima Tete, Sushila Chanu Pukhrambam, Jyoti, Navjot Kaur, Monika, Mariana Kujur, Sonika, Neha, Baljeet Kaur, Reena Khokhar, Vaishnavi Phalke, Ajmina Kujur.

Forwards: Lalremsiami, Navneet Kaur, Vandana Katariya, Sharmila Devi, Deepika, Sangita Kumari, Mumtaz Khan, Sunelita Toppo.