Beiseina neitu Liverpool-in Foxes dinhmun an tiderthawng

Season tawp hnaih lamah Liverpool-in Champions League khelh an beisei thar a, Leicester City tan erawh season thara English top flight league khel zel turin hmabak a hautak chhunzawm.

Thawhṭanni zan khan Leicester City khelmualah Premier League match khel turin Liverpool an lenglut a, Reds hian tlak hlau Foxes hi 3-0 in khualmualah an hneh.

Liverpool tan Curtis Jones chuan goal hnih khungin, tun hnaia harhtharna chang Trent Alexander-Arnold chuan goal khat a thawh bawk - goal thum hi Mohamed Salah assist vek a ni.

Merseyside club-in hnehna an chan avangin pathumna Newcastle United leh palina Manchester United an phak lohna chu point khat a ni a, match khatin an khel tam thung - Reds tan CL beiseina a nung zel a, 19-na Foxes dinhmun erawh a chhe ta hle.

Hello CL!

King Power Stadium-a inkhelah Foxes-in goal venhim ngaihtuah chungin, fimkhur takin an khel a, Reds pawhin an beisei angin bul an ṭan thei lo - Luis Diaz leh Fabinho ten chance nei mah se an chhawr thei lo a, goal khung turin an nghah rei a ngai dawn niin a lang hman.

Mahse, minute 33-naah Curtis Jones a rawn lang zawk a, Salah ball siamsak ṭha mi chu hmahruaina goal ni turin a khung - Foxes an insiamrem hman lo, minute thum a liam a, Salah siamsak vek chu Jones chuan tun hnai match hniha a goal thumna ni turin a khung.

Liverpool-in an la duhtawk lo cheu - minute 71-naah Salah chuan Arnold-a freekick pet tur chu a thaisak zeuh a, English right back hian mawi zetin goal-ah a chantir.

Reds goal thum hi Salah assist vek a ni a, Egyptian forward hian goal thum a luh hnuah chance nei ve mah se ṭum danga a khung ṭhinnaah a khung thei lo a, Cody Gakpo-a khung ngei tura lang Leicester goalkeeper Daniel Iversen-a'n a dan pawh pui tak a ni.

Beiseina

Premier League match sarih zet a zawna chak tawh Liverpool-in league match hnih khelh an la bak a, an tan season thara Champions League khel turin Magpies leh United chetsual chân tel a ngai thung.

Magpies leh United hian match thum ve ve an la bak a, hetah hian match hnih ve ve an chak chuan Liverpool tan um phak theih an ni tawh dawn lo. Reds hian European football hrim hrim an khel dawn chiang a, CL an khelh phak loh pawhin Europa League an khel ang.

Liverpool hi season tawpah parukna aia hniamah an awm thei tawh lo - Premier League table-a pangana leh FA Cup champion chu Europa League khel turin an tling ṭhin a, FA Cup final khel tur Manchester City leh Manchester United chu European football khel tur chiang an nih avangin, FA Cup champion chan ai hi league lamah a kal leh a ni.

Premier League champion meuh ni a, football thawnthu ngaihnawm lo ziak tawhtu Leicester erawh tla thei dinhmunah an ding mek - point hnihin 17-na Everton an phak lo mek a, an hmabakah Newcastle leh West Ham an la awm bawk. Hammers hi Foxes tlawm avangin an him ta chiah thung.