Barcelona hi Messi 'in' a ni - Joan Laporta

La Liga champion Barcelona president Joan Laporta chuan Catalan club chu Messi tan chuan a 'in' a nih thu a sawi a, kum 35 mi forward chu Nou Camp lamah tihlunglen a tum mek.

Messi hian June-ah Paris St-Germain-a a contract neih lai chu a hmang zo dawn a, Barca bakah hian Saudi Arabia lam club chuan khawvela footballer hlawh hnem ber ni turin an sawm nia sawi a ni a, MLS club Inter Miami hming an lam ri bawk.

Mahse, Laporta chuan an club ropuina hmanga Messi an thlem lungawi theih a rin thu sawiin, "Kan thawnthute hian kan lam an ṭang a, Messi chuan he club hi a thinlung a pe a, khawvel hmun hrang hrangah fans maktaduai 400 chuang kan nei bawk," a ti.

Laporta chuan Messi nen ṭha taka an inbiak thu leh, World Cup 2022-a Argentina a champion pui khan lawmpuina thu a thawn thu a sawi bawk.

Barca President chuan, "PSG player a nih avangin season zawh hun kan nghah phawt a ngai a, nakinah hahdam zawkin kan la sawi thei ang chu. Saudi Arabia hi ka zah viau a, mahse, Barca chu Barca kan ni a, Messi tan chuan a in a ni," a ti a, a intitatu hle.

Kum 35 mi Messi hian Barca tan kum 21 khelin, La Liga (10), Copa del Rey (7), Spanish Super Cup (7), Champions League (4), UEFA Super Cup (3) leh FIFA Club World Cup (3) ah te champion nomawi a chawipui.

Catalan club tan match 778-ah goal 672 khungin assist vawi 303 a nei. Mahse, season hmasa ṭan dawn khan sum lam harsatna avangin a chhuahsan a, PSG tan match 72-a goal 31 khungin, assist vawi 34 a nei.

Season hmasa khan Ligue 1 nomawi a chawipui a, tun season match 38-ah goal 20 khungin assist vawi 19 nei mah se, Barca ṭantuten pathian ang maia an en hi PSG fan-ten tun hnaiah an au el fo.