Pogba tan season a tawp?

Juventus chuan an midfielder Paul Pogba chu a malpui a hliam tih an nemnghet a, a chawlh chen tur tak sawi chian theih la ni lo mah se tun season chhungin khelmuala a luh theih a beiseiawm ta lo.

Pathianni zana Old Lady leh Cremonese inkhelh ṭumin Pogba hi minute 24-na lekah a hliam. Italian club a zawm leh hnuah inkhel pangngaia bul a ṭanna hmasa berah a hliam a ni.

Juve chuan thuchhuah siamin, "Paul Pogba-a hliam chu JMedical-ah endik a ni a, tah chuan a malpui vei lam a hliam tih kan nemnghet. Enkawl dam leh tura hmalak a ni a, eng chena rei nge hun a mamawh dawn erawh kan sawi thei lo," an ti.

Tun season chhungin Juve hian match khelh tur pali an la nei, an match hnuhnung ber chu June 4 hian Udinese nen an khel ang. Match an neih tur zingah hian Europa League semifinal second leg pawh a tel.

Pogba hian nipui bazar lai khan Juve hi a zawm a, season tir inbuatsaih laiin a inhliam. Nikum April thla hnua a vawi khat nan Cremonese lakah bul a ṭan ve leh chauh a ni - Manchester United a chhuahsan hnuah chanchin ṭha a la nei hleithei lo.