Arteta-a'n ngaihdam a dil

Arsenal manager Mikel Arteta chuan an beisei leh duh tak Premier League an chawi phak dawn lo tih a pawm a, an tum ram an thlen zawh dawn tak lohah chuan rinawm taka anmahni ṭantu fans chungah ngaihdam a dil.

Manchester City an chak laiin Arsenal an chesual zel a, anmahni khelmual Emirates Stadium-ah ngei fans pungkhawm ṭhahnem viau mah se Brighton and Hove Albion an ngam loh avangin an beiseina a thamral.

Gunners manager Arteta chuan, "Hmanni lawkah kha chuan Emirates Stadium-ah hian inchhuang leh intithei takin kan ding a ni a, tunah zet chuan ngaihdam dil a ngai ta zawk si.

"Chhiarkawp dan chuan kan la champion thei, mahse chu chu beisei ngam chi a ni tawh lo. Tunah chuan kan khel ṭha tawk lo tih kan pawm a ngai a, a pai dam dan kan ngaihtuah a ngai," tiin a sawi.

April thlatir khan Arsenal hian Leeds United chu 4-1 in an hneh a, anmahni hnaih bertu Man City aiin point riatin an sang zawk. Mahse, tun hnai an match hnuhnung pasarihah vawi hnih chauh chakin an beiseina a thamral chhunzawm.

Season hmasa khan North London club hian Champions League khelh an beiseina a sang hman hle a, mahse an khel phak ta lo. Tun season-ah champion tum mah se an champion lo a, an thil tum erawh a sang ta hret.

Inrinni zanah Mikel Arteta naute hian Nottingham Forest an hmachhawn dawn, an chak lo a nih chuan an inkhelh leh hmain Man City an champion ang - Gunners an chak a nih pawhin Citizens hian Pathianni zana Chelsea an hneh chuan an champion tho ang.

Champion thei ta lo mah se Champions League an khelh dawn avangin Arsenal tan lawmna tur a ni. Chutihrualin, coach Arteta erawhin fans lam beisei an phak loh avangin hrehawm a tih thu a sawi.

Spanish manager Arteta chuan, "Mi beisei ang phak loh a, beidawnga siamtu nih hi hrehawm ka tih zawng tak a ni. Tunah chuan fans rilru kan tih nat avangin hrehawm ka ti a, chuvangin ngaihdam kan dil a ni," tiin a sawi.