Rafael Nadal a la inkhel ngam rih lo

French Open khelh ṭan hmain ni tam a awm tawh lo, champion lai Rafael Nadal chu tun dinhmunah hian inkhel thei loin a la awm mek, inbuatsaihna nei miah loin Paris a pan dawn nge, a inkhel thei lo tlang dawn a chiang ta lo.

A elpui tur player dang ten Italian Open an khel suau suau a, khel bawr hliam vangin Nadal a chawl mek. Kar leha khelh tur Bordeaux Open lam chuan duhsak takin Nadal hi wildcard pek an tum a, mah se a lo hnawl.

January thlaa khelh zawh tak Australian Open hnuah Nadal hi a la inkhel leh thei rih lo, tun dinhmunah chuan vawi 14 a champion tawhna French Open khel lo thei dinhmunah a ding mek.

Bordeaux Open director Jean-Baptiste Perlant chuan, "Nadal-a agent Carlos Costa hnenah wildcard pakhat chu an duh chuan kan pek theih thu kan hrilh a, mahse anni lam hian inthlahrung leh hawihawm takin an la inkhelh theih loh thu min hrilh," a ti.

Nadal hi Italian Open bakah Indian Wells, Miami Masters, Monte Carlo leh Barcelona Open aṭangin a inhnukdawk vek a, season dang ang chu ni se a inkelh thiamna hmun a nih hlawm avangin nomawi eng emaw zat chu a chawi ngei a rinawm.

Mahse, May 28 aṭanga khelh tur French Open-ah a inlan thei lo a nih chuan, amah ang bawka Grand Slam nomawi 22 nei tawh Novak Djokovic chuan Nadal khuma major title la hnem ber nih theihna remchang a nei dawn a ni.