Number 1 thar Alcaraz a tla

Carlos Alcaraz-a'n world ranking-ah Novak Djokovic a nek chhuak leh dawn tih a chiang tawh a, mahse world number 1 ni thar leh tur hian Italian Open lamah erawh result ṭha a nei chhunzawm thei ta lo.

Thawhṭanni zan inkhelah Spanish rawlthar hi Fabian Marozsan lakah 6-3, 7-6 (7-4) in a chak lo. Hungarian tlangval Marozsan hi a ranking a hniam (number 135) avanga qualifying aṭanga invaw tling a ni a, atan Alcaraz hneh hi mellung pawimawh a ni.

Kum 20 mi Alcaraz hi clay court-a inkhel thiam a ni a, kumin bikah phei chuan match 22 a khelh tawh chinah vawi hnih a chak lohna chauh a la ni hial. Mahse, Marozsan a ngam tlat - ani hian a match lehpekah Borna Coric a tum ang.

Spanish rawlthar Alcaraz hian tun hnaiah a zawnin Barcelona leh Madrid Open nomawi a chawi a, tun ṭumah hian hlawhtling ta chiah lo mah se number 1 ni chungin French Open a khelh theih phah dawn, seeded pakhatna a ni dawn tihna a ni.

US Open champion lai Alcaraz chuan, "A khelh dan khan min barakhaih nasa khawp mai, ka khel ṭha tawk lo tih chu ka hria a, chutihrual chuan ka khingpui khan hnehna chan phu khawpin a khel," tiin a hneh loh player a fak.

Mipa singles inkhel dangah Daniil Medvedev chuan bul ṭan fuh tawk lo mah se Bernabe Zapata Miralles chu 3-6, 6-1, 6-3 in a hneh a, world number 1 hlui Medvedev hian tun hmain Rome khawpuiah hian hnehna a la chang ngai lo, a chakna hmasa ber a tawng.

Russian star Medvedev chuan, "Clay court bikah chuan tun season hi ka khelh ṭhat ber a la ni, a nuam ka tiin beisei pawh ka nei sang chhunzawm," a ti a, inelna lian French Open atan inrintawkna a nei dawn.

Season dangah chuan Medvedev hian clay court tournament-ah hian chak ni hmel a hmu ngai meuh lo, tun season-ah erawh champion chiah lo mah se Madrid Open (last 16) leh Monte Carlo (quarterfinal) te pawh a khel ṭha hle a ni.

Thawhṭanni zan inkhel dangah seeded parukna Andrey Rublev pawh a chak. Thla hmasa maia Monte Carlo Masters champion hian Spanish tlangval, seeded 27-na Alejandro Davidovich Fokina chu 7-6 (10-8), 6-3 in a hneh ve bawk.

Hmeichhe singles lamah Wimbledon champion Elena Rybakina chu seeded pasarihna pek a ni a, ani hian quarterfinal lut trurin a khingpui Marketa Vondrousova chu 6-3, 6-3 in a hneh.

Kum 23 mi Rybakina hian 2021 khan Roland Garros-ah quarterfinal a lo lut tawh, a hnu lamah tun ṭum hi clay court inelna bikah chuan a thiam zual pariat zinga a tel lehna hmasa ber a ni.

Nizan khan world number 1 Iga Swiatek leh Donna Vekic an inkhel a, a chak zawk chuan Kazakhstan nula Rybakina hi an hmachhawn chhunzawm leh ang.