Car neiha lungawi lo Leclerc

Tun hma deuh chuan Ferrari car khalh phak chu midang chunga leng an ni ṭhin. Hun a inher hret a, tun hnai chhoah chuan Formula 1 team dangten Italian team hi an el phak a ni satliah lo a, an hmaah an tlan ta zawk niin a lang.

Ferrari driver Charles Leclerc chuan F1 season an hman laiah an car chu beisei ang a ni lo tih a sawi a, dinhmun ṭha taka an din hnuah pawh an tan hnehna chan a harsa tih a sawi bawk.

Mercedes rorelna a tawp leh rih a, chumi hnuah Red Bull an vul leh mek. Kuminah bik phei chuan Red Bull ni lo team dang zingah hnehna chang thei an la awm miah lo - Ferrari tan kawng a la inhawng ve leh rih lo a ni.

Mexican tlangval Leclerc chuan, "Kan car hi hriattthiam a harsa, kan theihna vawrtawp chu kan thleng phak lo hleah ka ngai. Qualifying tlan lai chuan kan zia viau a, intlansiak takah hian beisei kan phak thei lo," a ti.

Season hmasa kha chuan Leclerc hi Red Bull driver Max Verstappen el phak berte zinga mi a ni a, tun season erawh a insiamṭha viau a nih ngawt loh chuan a sang zual pathum zinga tel phak pawh a harsa dawn.

Intlansiak vawi nga an neih tawh chinah Leclerc hian point 34 hmuin table-ah pasarihna a ni mek a, hmahruaitu Verstappen erawhin point 119 a nei tawh thung.

Car intlansiakna sang ber hi tun season chhunga parukna atan May 21, Pathianni zan hian Italian Grand Prix an tlan leh dawn a ni.