Uruguay coach thar Bielsa

Leeds United manager hlui Marcelo Bielsa chu Uruguay national team coach atan ruat a ni - South American ram nen hian kum 2026 World Cup thleng daih inremna an ziak.

Kum 67 mi Bielsa hian nikum February thla khan Elland Road a chhuahsan a, a hnu lamah tun ṭum hi hna nghet a neih lehna hmasa ber a ni a. Premier League club Bournemouth leh Everton te nen sawi zawm ni mah se Uruguay lam a hawi ta zawk.

Argentine manager hian 2018 khan Leeds a zawm a, kum 16 zet hnuah Leeds hi Premier League khel turin Championship aṭangin a tlinpui a, a hnathawh avangin fans ngainat a hlawh hle.

Tun hmain France, Italy, Spain leh an ram Argentina lamah hna a lo thawk tawh ṭhin, ram team enkawl chungchangah pawh 2007-2011 khan Chile a lo kaihruai tawh bawk.

World champion vawi hnih ni tawh Uruguay hian a tawnhriatte an ringtawk a, tunah chuan World Cup zawha bang ta Diego Alonso hmun ruak a hnawh khat dawn.

Qatar World Cup-ah khan Uruguay hian group stage an paltlang zo lo, tun dinhmunah hian FIFA ranking-ah 16-na an ni a, an player neih dan chhut chuan tun aia sang hi an thlen theih a rinawm.