Hammers-in Rice dawr an phal rih lo

Europa Conference League semifinal khel tur West Ham chuan an player pawimawh Declan Rice chungchangah eng club mah dawr an tum rih lo a, season tawp hma chu Rice chungchanga dawr rih lo turin club dang an ngen.

Hammers boss David Moyes chuan kar hmasa khan an player Rice chu nipuiah a chhuah ngei a rin thu a sawi a, English midfielder hian West Ham-in contract thar ziak tura an sawmna zawng zawng chu a la hnar rih vek a ni.

Hemi a nih avang hian Rice hi a chhuak ngei dawn tih a chiang a, mahse, Hammers hian season tawp lam boruak san laia player transfer chungchanga indawrna lo neih buai hi an duh rih lo.

Kum 24 mi Rice hian London club-ah hian kum 2024 thleng cham turin contract a nei mek a, a contract hi a ṭul dan a zira kum khat dang pawhsei theih tura tih a ni bawk.

Mahse, Hammers tana match 241-a goal 14 leh assist 13 neitu hian contract pawhsei aiin chhuah a duh zawk a, West Ham hian pound maktaduai 100 chuanga chhuahtir an tum nia sawi a ni.

West Ham hi Premier League table-ah 15-na an ni mek a, Leicester City-in Liverpool an hneh loh avangin tla thei tawh lo anga ngaih ni mah se chhiarkawp danin tlak theih dan a la awm.

Hammers hian Ningani zan hian AZ Alkmaar nen Champions League semifinal second leg an khel dawn bawk a, Dutch team hi first leg-ah 2-1 a lo hneh tawhin, second leg hi khualmualah an khel dawn a ni.