CYMA Football 2023 Pet Hawn a ni ta
LBS Suzuki 21st Inter Branch Football Tournament 2023 chu Thawhlehni zan khan Vanapa Hall-ah a hawnna neih a ni a, Mizote inelna ngaihhlut chu vawiin aṭangin khelh ṭan a ni dawn.
Inelna sponsor-tu LBS proprietor H. Ngurdingliana'n CYMA Football 2023 a pet hawng a, CYMA president R. Lalngheta leh MFA honorary secretary Lalnghinglova Hmar ten thu an sawi bawk.
An intiam e
Mizo football legend S. Malsawmtluanga (Mama) kaihhruainain 'oath taking' neih a ni a, branch YMA aiawha kalkhawmten team aiawhin dan hnuaia inkhelh an intiam.
MFA honorary secretary Tetea Hmar-in dan hnuaia inkhelh buatsaih a nih tur thu a sawi a, match official thutlukna zah a ṭul thu a sawi.
MFA buatsaih veng/khua inelna hnuhnung ber chu nikuma neih All Mizoram Inter Village Football Tournament kha a ni a, khami ṭuma hremna tawk Armed Veng South chuan tun ṭum inelna hi an hmachhawn thei lo. AVS bakah MFA hrem lai player-ten inelna hi an hmachhawn thei dawn lo bawk.
Infiamna tan YMA
CYMA-in infiamna hmasawn nan hma ṭha takin a la tawh ṭhin a, kuminah pawh hlawhtling takin Table Tennis inelna neih a ni tawh. Hmachhawpah Carrom inelna a la awm bawk.
Heng inelna bakah tun hmain volleyball, basketball, cricket, badminton, rifle shooting, athletics, sepaktakraw, arm wrestling leh indigenous games te hlawhtling takin a buatsaih tawh a ni.
CYMA hian infiamna leh infiammite hmasawnna a thlir piah lamah Mizo ṭhalaiten nun kawng dik an zawh theih nan thupui a thlang. Kumin bik tana thupui chu 'Ruihhlo do la, i ram chhan rawh' tih a ni.
Mizote World Cup
Mizoram chhunga football inelna sang ber chu Mizoram Premier League a ni a, inelnaa telte hi football eizawn nana hman tumte an nih hlawm avangin a telte pawh an ṭha.
CYMA Football-ah chuan Branch ṭhenkhatin MPL khel pha pahnih pathum an nei ang a, ṭhenkhat phei chuan an nei lo ang. Football ngawr ngawra thlir chuan MPL a pha lo hle. Mahse, CYMA Football chu veng/khua inelna a ni tlat a, ngaihventu an tam zawk.
Veng tin, khaw tinin mahni team inkhel ṭheuh an ngaihven a, a tel lo veng leh khuate pawhin ṭhenawm veng leh khua te khel an ngaihven hle. Mizoram hmun hrang hrang aṭangin team a tel a, tun ṭumah pawh hian team 145 zet an tel.
Hei vang hian CYMA Football hi Mizote World Cup tia sawi pawl an awm a, a mak hran lo. Ngaihventu an ṭhathnem miau avangin inkhel boruak pawh inelna ṭantirh aṭangin ṭang nghal at ang.
