Champions League final khel tur Inter Milan
Inter Milan chuan kum 13 hnuah Champions League final an lut leh ta. Lautaro Martinez-a goal khat hmangin AC Milan 1-0 in an hneh a, an intawn tawhna nena belhkhawmin Simone Inzaghi naute hi 3-0 in an tlang.
Champions League vawi thum champion tawh Inter Milan hian, nizan semifinal hnuhnung zawka Manchester City leh Real Madrid inkhela chak zawk an tum dawn - June 10 hian Turkey khawpui Istanbul-ah a hmawr bawk a ni dawn.
Goal khat a tawk
Inter Milan tan goal khung tum vak a ngai tawh lo a, first leg-ah 2-0 a an chak tawh avangin an goal venhim a pawimawh zawk. San Siro-ah Inter hi mualneitu zawk an ni, a tir aṭangin UCL final luh tumin fans thawm a ṭha hle thung.
Milan tan an intawn hmasaka inlan thei lo Rafael Leao a lo kir tawh a, Portuguese forward bakah Theo Hernandez leh Brahim Diaz ten goal khung theihna remchang nei mah se Inter goalkeeper Andre Onana an paltlang thei tlat lo.
Second half minute 74-naah, striker Romelu Lukaku chuan hla tak aṭangin Martinez tan ball a vawrh chu Argentine striker hian amah vengtu defender tlan bumin, laklawh nei miah loin goal mawi a khung - goal khat hi an chak nemngheh nan a tawk.
Awih a harsa
Simone Inzaghi chuan an thil tawn chu tun dinhmunah chuan awih mai a harsa a tih thu a sawi a, season an hman dan chhut chuan Italian manager tan chuan UCL final luh chu a lawmawm zual ngei ang.
Inter coach Inzaghi chuan, "Kan tan chuan UCL final luh hi duhthusam leh suangtuahna a ni a, tunah chuan a takin kan thleng ta tih kan pawm a ngai. Semifinal a ni satliah lo a, derby ropui takah kan chak a ni," tiin a sawi.
Barcelona leh Bayern Munich te nen group pakhata an awm khan Inter hi tla tura ngaih an ni, an buk a rit lo. Mahse, Inzaghi hoin an kal zel a, Serie A lamah beisei phak lo mah se tunah chuan UCL nomawi chawi thei dinhmunah an ding.
Hmabak chu
Real Madrid emaw Manchester City emaw pawh ni se hmachhawn an châkawm lo ve ve ang. Mahse, Inter hian final hial an thleng thei a, squad an nei chhah ve hle bawk. Inzaghi chuan, "Madrid leh City chu Europe khawmualpuia team ṭha ber pahnih an ni," a ti.
Nerazzurri defender hlui, hun rei tak chhung captain armband pawh lo hreng tawh tuna Inter vice-president ni ta Javier Zanetti chuan, "Real Madrid hi hmachhawn loh theih ni se ka duh zawk, a chhan chu UCL hi chu anmahni tana buatsaih ni maiin ka hria," tiin a sawi.
Milan laka goal awmchhun khungtu Martinez erawhin hmachhawn hlauh leh châk zawk a nei hran lo a, a tan chuan Champions League final khelh hrim hrim chu duhthusam thleng dik a nih thu a sawi ve bawk.