Arsenal chhuahsan tur Xhaka

Granit Xhaka chuan tun season tawp rualin Arsenal a chhuahsan dawn, tun hma lama hun a hman tawhna Bundesliga lamah a kal ang - a club hlui Borussia Monchengladbach ni loin Bayer Leverkusen chuan pound maktaduai 13 vel bawrin an lei dawn a ni.

Kum 30 mi Xhaka-a'n Gunners tana a contract neih lai hi kum 2024 June thlaa zo tur a ni a, season khat hun a la nei tihna a ni. Mikel Arteta-a'n a midfielder hian season ṭha tak a hman thu sawi zo chiah mah se, a chhuah tur thuin a zui ta zawk.

Switzerland international hian Emirates Stadium-ah kum sarih chhung hun a hmang hman a, hun harsa tak tak pawh a paltlang. Fans lamin an auhel hial a tawh lai pawh a awm, mahse tun season tawpa a chhuah meuh chuan Gunners ṭantuten ui takin an kaltir thung ang.

Arteta-a'n thuneihna a chan tirh khan Xhaka hi a biak hmasak zinga mi a ni a, chhuah tuma rilru siam tawh chu cham turin a hmin. Tun season bikah phei chuan Premier League match 36 an khelh zinga 34 zetah a bul ṭantu a ni vek.

Leverkusen nen a thuphungin an inrem tawh a, a contract ziah tur hi kum li chhung atan a ni ang - mimal thil tih fel ngai erawh a la nei thung. North London club hian a hmunruak luah thei tur an zawn ngei a ṭul dawn a ni.