Jokic hoin Nuggets an chak hmasa

NBA Western Conference Finals khelh ṭan a ni a, nimin zing inkhelah Denver Nuggets chuan Los Angeles Lakers lakah 132-126 in hnehna an chang a, best of seven series khelh turah Nuggets hian 1-0 in hma an hruai.

NBA Most Valuable Player atana vawi hnih an thlan tawh Nikola Jokic-a'n Lakers lakah triple-double (34 points, 21 rebounds and 14 assists) a nei a, hnehna an chan theih nan a thawh hlawk takzet.

Nuggets hian point 21 zetin hma an hruai fal thei, quarter tawp ber an khelh laiin Lakers lamin an inkar hi point liah sawr zim mah se, hun pawimawhah Jokic chuan free throw rawn lut lehin a team a chakpui a ni.

Denver coach Michael Malone chuan, "Ka player tam zawkin fiahna hautak an paltlang, team ṭha tak lakah ṭha taka an khelh chhuah theih avangin ka lawm hle," a ti. Jokic bakah hian point 31 neitu Jamal Murray a langsar bawk.

Lakers thiampuipa Anthony Davis-a'n point 40 a nei a, player ṭha LeBron James (26 point) leh Austin Reaves (23) te khel ṭha bawk mah se Denver muala chak nan a tawk zo lo. May 19, Zirtawpni zinga game 2 an inkhelh hunah chuan a tir aṭanga an fimkhur a ngai tawh ang.

Lakers coach Darvin Ham chuan, "Tun ṭuma kan inkhel hi ngun takin kan ennawn leh ang, chutah chuan insiamṭhat kan ngaihna lai chu chiang takin a lo lang mai dawn a ni," tiin hmasawn an tum thu a sawi.

NBA Eastern Conference pawhin tukin aṭang hian conference finals an khel ṭan. Boston Celtics chuan Miami Heat an lo mikhual. Conference champion team pahnih ten NBA Finals an la khel zui leh ang.