Goal khung tum Leverkusen mualah Roma

Jose Mourinho-a enkawl AS Roma chuan zanin dar 12:30 hian Bayer Leverkusen an lenchilh dawn. Europa League final lut turin Xabi Alonso enkawl Bundesliga team tan goal khung ngei a ngai dawn.

Sevilla pawhin anmahni mualah Juventus an mikhual dawn, team pahnih hi Turin khawpuiah 1-1 in an inhnehtawk - Spanish leh Italian club hi an la intluktawk mek, zaninah an chingfel ang.

Goal a ngai

Rome khawpuia an kal hma khan Leverkusen hian tun season Europa League match ruk aṭangin goal 14 an khung, match zawng zawngah an khung vek. Mahse, goal ven thiam Mourinho naute an tum meuh chuan an kaltluang lai hi a tawp.

Kai Havertz, Julian Brandt leh Leroy Sane te chawr chhuahna club hian rawlthar duhawm an nei leh mek, coach Alonso pawhin German rawlthar duhawm Florian Wirtz a ringtawk hle - German attacking midfielder hi Roma tlarhnung tana ven uluk ngai tur a ni.

Alonso-a'n team a din thar lehnaah rawlthar rual a hmang nasa. Wirtz bakah hian Jeremie Frimpong (22), forward Moussa Diaby (23), winger Amine Adli (23), striker Adam Hlozek (20) Exequiel Palacios (24) te a hmang rim - zaninah an puitling tawh em, tih fiah a ni dawn.

Roma khawpuia an inkhelh zawh khan Alonso chuan an result neihah an lawm lo tih a sawi a, chak ngei tuma tournament khelh an ni tih a sawi bawk, an tan chuan zanin hi tho chhuak tura hun pawimawh a ni.

Alonso-a'n theihtawp a chhuah dawn a, chutihrualin a hmachhawn tur Mourinho hi coach tawnhriat nei ṭha leh tlarhnung lam ven thiam hmingthang a nih bawk avangin hna a hautak dawn, inkhel hmuhnawm an chhawp chhuak ngei ang.

Chak tum Juve

Allianz Stadium-a an inkhelh ṭum khan mualneitu Juventus lamin hun tawp dawnah si phurh an sut zo hram a ni a, an tan Seville khawpuia inkhelh hi thil awlsam a ni dawn lo. Coach Massimiliano Allegri chuan a theihna sang ber an hlan tur thu a sawi.

Old Lady coach Allegri chuan, "Match khat lek hian season kan hman pumpui a hrilhfiah kher lo. Tun ṭuma kan khingpui tur hi Europa League vawi ruk champion tawh an ni a, anni kan hneh theihna tur a nih chuan kan tih theih zawng zawng kan ti dawn.

"Sevilla khelmuala phul hi inkhelh awlsamna a ni lo tih pawh ka hria, mahse chumi hmuna insiamrem chu kan tum dawn a ni," a ti. Italian manager hian player inlan tur a la thlang fel lo tih a sawi a, inkhelh dawn hnaihah a puang dawn tih a sawi bawk.

Juve hian hliam vangin Paul Pogba an chhawr thei dawn lo. France international hi malpui hliam vangin a chawl mek, tun season chhunga an la chhawr mumal loh avangin Italian club tan chânna lian tak chu a ni rih lo ang.

Europa League a nih tawh chuan Sevilla hi dah hniam an rem lo - Manchester United pet chhuak theitu an ni. Coach Jose Luis Mendilibar hian team enkawl ngah tawh viau mah se nomawi a la chawi ngai lo, champion turin a ṭha tawk em, tih fiahna hmasa a ni ang.