Europa Conference League - West Ham tan beisei a sang

Kum 1999 khan West Ham-in UEFA Intertoto Cup-ah champion nomawi an chawi a, hemi hnu hian Hammers hian champion sawi rik tur an nei leh tawh lo.

Kum 2006 khan FA Cup final khel mah se 'The Gerrard Final' tih hiala hming an pek inkhelah Steven Gerrard an ngam lo a, ui tak chungin nomawi an thlir liam.

Mahse, Hammers tan hun duhawm a awm leh ta - European final khel thei dinhmunah an ding mek. London club hian zanin dar 12:30-ah Europa Conference League semifinal second leg khel turin AZ Alkmaar an lenchilh dawn.

Semifinal first leg-ah Hammers hian 2-1 in hnehna an chang a, final lut turin goal venhim chiah an mamawh. Semifinal inkhel dangah, zanin dar 12:30 vek hian FC Basel chuan 2-1 a an hneh tawh Fiorentina an mikhual dawn bawk.

Hammers beiseina

Chhiarkawp dan anga chhutin West Ham tan Premier League aṭanga la tlak theih a ni a, mahse, Thawhṭanni zana Liverpool-in Leicester City an hneh avangin Reds tan division hniam lama tla tur chuan thilmak a thlen tel a ngai tawh.

Liverpool boss Jurgen Klopp pawhin, "West Ham an hlim khawp ang. David Moyes pawh European semifinal khel turin a inbuatsaih thei ang," tiin Foxes an hneh zawhah a sawi a, Hammers tan ECL-ah rilru a sawrbing theih thu a sawi.

Moyes hian Premier League aṭanga tlak hlauhthawnna nen a team a rem a ngai tawh dawn lo tihna a ni a, Pathianni zanah league match khelh tur nei lehnghal dawn mah se zaninah pawh an ṭhat dan angin an inrem thei ang.

West Ham hian season hmasa khan Europa League khelin, semifinal-ah an lo tla tawh a, champion zui ta Eintracht Frankfurt an ngam lo - zaninah thawnthu hlui thlen nawntir loh hram an tum dawn.

Thawnthu danglam

David Moyes-a'n football khawvelah hun a hmang rei tawk tawh a, mahse, Scottish coach hian rei lotê Manchester United a enkawl ve tih loh chu club liantham enkawl a la nei ngai lo - hei vang hian coach a nih hnua nomawi a sawi ve theih chu United-a FA Community Shield an chawi kha a ni deuh tlawng!

Preston North End, Everton, Real Sociedad leh Sunderland pawh lo enkawl tawh Moyes hian ECL nomawi a chawi a nih ngat chuan a hun tawna ropui ber a nih tur thu a lo sawi tawh - zaninah thi leh thau pawlha beih a duh ang.

Moyes chuan, "European final khelh hi ka career-a ka hun tawn ropui ber a ni hial ang. United ka enkawl laiin Champions League quarterfinal ka lut tawh a, penalty-ah kan vanduai. Season hmasa khan West Ham nen semifinal kan lo khel tawh bawk," tiin a lo sawi tawh a, final luh hram a duh.

LMA Manager of the Year ṭum thum ngawt ni tawh Moyes-a'n a vawi khat nana European football inelna final-a a team hruai thlen a châk a, AZ Alkmaar laka an pu beiseina tihlawhtling turin Hammers player an ṭha tawk.

Team dinhmun

Moyes-a'n kar hmasa Premier League inkhelah pawh ECL a ngai pawimawh tih a pholang a, Brentford lakah Said Benrahma, Declan Rice, Jarrod Bowen, Lucas Paqueta leh Kurt Zouma te chu bul a ṭantir lo a, zaninah hahdamin an inlan thei ang.

Semifinal first leg-ah goalkeeper Alphonse Areola che fuh tawk lo mah se, cup game bika keeper atana an hman a nih miau avangin an rin nawn a rinawm a, tlarhmaah Michail Antonio mawhphurhna a sang leh dawn bawk.

AZ Alkmaar hian Hammers an ngam loh hnuah league-ah an thinrimna an hri thla a, an mikhual FC Emmen chu 5-1 ngawtin an sawp. Zaninah pawh mahni muala khel tur an nih avangin an inringtawk ang tih a chiang a, West Ham lakah chak an tum dawn.

Pascal Jansen-a enkawl team tan tun season-a goal 22 leh assist 11 nei tawh Vangelis Pavlidis a ṭangkai ang tih a chiang a, attacking midfielder Sven Mijnans leh winger Jens Odgaard te pawh an pawimawh ang.

Fiorentina hi

ECL semifinal an intawn hmasakah rin loh takin FC Basel-in Fiorentina an hneh a, zanin dar 12:30-ah second leg an khel leh dawn - Basel khelmuala inkhel tur an ni a, Swiss Super League team hian mahni muala chak an tum ang.

Basel boss Heiko Vogel-a'n ECL semifinal second leg an la khel leh dawn tih hriain, kartawp league-ah player ṭha a hahdamtir nual a, St. Gallen lakah 6-1 ngawtin an tlawm - Fiorentina tan rimawi a ni.

Italian club hi Basel an hneh loh hnua an insiamṭha nghal a, kartawp Serie A inkhelah Udinese chu 2-0 in an hneh. Tun season-a goal 16 khung tawh Arthur Cabral bawk chu Fiorentina tan innghahna a ni leh dawn a, Jonathan Ikone leh Nicolas Gonzalez ten an thlawp ṭhat a ṭul ang.

Basel tan tlarhmaah Zeki Amdouni chu innghahna a ni leh dawn a, Arsenal midfielder Granit Xhaka unaupa Taulant Xhaka hi tlarhnung venhim kawngah a ṭangkai dawn bawk - Swiss club hian goal venhim hmasak an ngai pawimawh a nih pawhin mak ti suh.