SAFF 2023: Group khatah India leh Pakistan

South Asian Football Federation (SAFF) Championship khelh tur atana draw chu nimin khan New Delhi-ah neih a ni a, India chu group khatah hmelma kumhlun Pakistan nen an awm dun dawn.

SAFF Championship hi June 21 aṭanga khelh ṭan tur niin, July 4 thleng a awh dawn a, SAFF ram bakah Lebanon leh Kuwait chu inelna hmachhawn tura sawm an nih angin an tel dawn bawk. SAFF ram ni sa hi India bakah Bangladesh, Bhutan, Maldives, Nepal leh Pakistan an ni.

FIFA hrem vangin SAFF ram zingah Sri Lanka an inlan thei dawn lo a, tun hmaa SAFF inelnaa tel ṭhin Afghanistan chuan SAFF chhuahsanin Central Asian Football Federation an zawm tawh bawk.

Bengaluru khawpuia neih tur inelnaah hian team pariat an inel dawn a, group pahnihah ṭhen hran niin, group A leh B-ah team pali ve ve an awm a, group pahniha a sang pahnihte chuan semifinal an lut ang.

India hi group A-ah awmin, Pakistan bakah Kuwait leh Nepal te nen an awm ho dawn bawk a, Blue Tigers tan awlsam taka group stage paltlang theih a ni bik lo ang.

Group B lamah Lebanon, Maldives, Bhutan leh Bangladesh an awm dawn thung - India chu SAFF Championship-a champion ngun ber niin vawi riat an champion tawh a, an dawta champion hnem Maldives chu vawi hnih an champion tawh.