England aia US thlangtu Balogun

Arsenal forward Folarin Balogun-a'n England aia USA tana inlan zawk a dilna chu FIFA chuan a pawmsak a, French club Reims-a loan-a khel mek striker hian US tan a khel ṭhin tawh dawn.

Kum 21 mi Balogun hi thisenah chuan Nigerian niin, USA-ah a piang a, England-ah a seilian thung. Ram pathum tan inlan theihna dan a nei a, a tawpa a thlan chu USA a ni.

England tan Under-17, U18 leh U21-ah te a inlan tawh a, USA tan U18-ah a inlan tawh bawk. A tawpah chuan a pianna USA a thlang a, US tan chuan striker ṭhangduang takin an ram tana inlan a thlang hi a lawmawm khawp ang.

Kum 21 mi Balogun hian Reims tan tun season inelna hrang hrangah match 36 khelin goal 20 a khung tawh a, assist vawi thum a nei bawk - hmabak a nei êng hle.

FIFA thupuangtu chuan, "Folarin Jolaoluwa Balogun-a'n England aia USA a thlanna chu pawmsak a ni," an ti a, Balogun chuan thutlukna siam tura inngaihtuah rei a ngaih loh thu a sawi bawk.

Balogun chuan, "Ka thutlukna ka hrilh chu ka chhungte an lawm em em a, a bik takin ka nu phei chuan, 'I inngaihtuah rei zawk ngawt alawm,' a ti hial.

"Mipuiin an hriatthiam aia nasain US tana inlan hi ka ngaihlu hial ang. He hun duhawm ka tawng thei hi ka lawm takzet a, kan hlawhtlin theih nan ka theihna zawng zawng hlan ka duh a ni," tiin a sawi.