Championship playoff final khel tur Luton

Kum 1992 hnua English top flight league khelh beiseitu Luton Town chuan kawng dik an zawh zel a, Championship playoff final khel turin Sunderland chu 2-0 in an hneh.

Championship playoff semifinal first leg-ah Sunderland hian 2-1 in hnehna an chang a, Premier League khel ṭhang Black Cats hian second leg atan pawh beiseina an nei sang hle.

Mahse, mahni muala inlan Luton an danglam a, chawlhlawk hmaa Gabriel Osho leh Tom Lockyer te goal hmangin Sunderland chu 2-0 in an hneh a, inkhel pahnih belhkhawmah 3-2 a chakin playoff final an lut der.

Nizan khan playoff semifinal second leg inkhel dangah Michael Carrick-a enkawl Middlesbrough leh Coventry an inhmachhawn a, he thu buatsaih a nih lai hian result kan hre hman lo - team pahnih hi first leg-ah 0-0 in an inhnehtawk tawh.

Championship playoff final hi May 27 zanah khelh a ni dawn a, season thara English second division aṭanga top flight league khel tura inpetkai a hriatkim ang.

English football-a inelna sang ber dawttu Championship-ah hian league-a pakhatna leh pahnihna chu Premier League khel turin an tling nghal ṭhin a, pakhatna Burnley leh pahnihna Sheffield United chu season thara Premier League khel tur chiang an ni.

Hmun ruak dang pakhat hi table-a pathumna aṭanga paruknaten playoff semifinal hmangin an chingfel ṭhin a, Premier League kai thar hian pound maktaduai 150 chuang hausakna an neih belh ṭhin avangin playoff final hi football khawvela sum inchuh tamna ber, tiin sawi a ni ṭhin.