Kum 2024-ah Bonucci a chawl dawn

Juventus captain Leonardo Bonucci chuan 2023-24 season tawpah inkhelh a chawlhsan tur thu a puang a, Italy captain hian kum 2024-ah Italian club-a a contract hi a hmang zo chiah dawn a ni.

May 1-a kum 36 tling ve chiah Bonucci chuan, "Nakkuma inkhelh ka chawlhsan hunah chuan, Italian style-a defending kan tih ṭhin hun tawpna a ni ang. Football khawvela defender ṭha ber berte nena kan khel ho thei kha ka chhuang hle," a ti.

Bonucci hian Andrea Barzagli, Giorgio Chiellini leh Gianluigi Buffon te khelhpuiin, Italy tan Euro 2020 nomawi an chawi bakah Serie A nomawi engemaw zat an chawi ho bawk.

Italian defender chuan, "Franco Baresi, Alessandro Nesta, Paolo Maldini leh Fabio Cannavaro te kan ngaisang em em ang khan, nakinah chuan defender naupang zawkten ngaisang takin min la thlir ve ang tih ka ring - chu chuan he game tan hian thil tam tak kan ti ve a ni, tih a nemnghet ang," a ti.

Bonucci hian Inter Milan aṭanga a professional career zinkawng zawh ṭanin, Treviso, Pisa, Bari, Juventus leh AC Milan-ah te a hmang a, a vanglai hun tam zawk chu Juve tan hian a hlan zo a ni.

FIFA FIFPro World11-ah vawi hnih ngawt langin, Serie A Team of the Year-ah vawi li a lang a, Serie A Footballer of the Year-ah ṭum khat thlan niin, UEFA Team of the Year-ah a lang tawh bawk.

Bonucci hian Serie A nomawi vawi kua chawiin, Coppa Italia-ah vawi li a champion a, Champions League final vawi hnih khel mah se nomawi a chawi lo thung.

Juve tan match 500 khel tawhin, goal 37 a khungsak a, ram tan match 120 khelin goal riat a khung tawh bawk.