A tawp thleng kan bei ang - Eddie Howe

Newcastle United boss Eddie Howe chuan season tawp thleng theihtawp chhuaha an beih tur thu a sawi a, an hnuaiah tu nge awm a, tuin nge hnaih, tih lam chu an ngaihtuah loh thu a sawi bawk.

Howe chuan, "A tawp thlengin kan bei dawn a, he team hi ka chhuang takzet - tha thlah hauh loa a tawp nan kan beih leh a ngai a ni," a ti a, zanin dar 12:00-a Brighton & Hove Albion an mikhual hunah hnehna chan ngei a tum.

Magpies hi Premier League table-ah palina an ni mek a, palina Manchester United nen an point hmuh zat inangin, pangana Liverpool aia an sanna chu point khat chiah a ni - match khatin an khel tlem thung.

Liverpool hian an league match hnuhnung pasarihah hnehna an chang vek a, April thlatira point kua zeta an thlauh Magpies leh United hi an hnaih leh tawh hle. Mahse, Howe erawh a zam phah lo.

English coach chuan, "Miin min um emaw, min rawn zui reng angah ka ngai lem lo. Tumah kan elpui lo a, keimahni leh keimahni hi kan inel a, kan ṭhat dan bera khelh zel kan duh. Season tluanin eng team dang mah ka ngaihven lo," a ti!

Howe chuan Liverpool chungchang sawi zawmin, "Ka tawnhriat aṭangin Liverpool ngaihthah a thiang lo tih hi chu ka hre sa a, engtiklai pawhin team ṭha tak an ni reng a ni. Manchester City ang thoin, harsatna nei miah loin tluang takin an chak thei.

"Liverpool nena inkhaikhin thei kan ni lo a, keimahni kan inen hi a pawimawh ber," a ti a, a ṭawng fimkhur hle - zaninah an chak zawh loh chuan Liverpool tan beiseina a sang sawt ang.