CYMA Football-a champion ngun ber Armed eng inlan hun

LBS Suzuki 21st Inter Village Branch YMA Football Tournament chu vawiinah khelh chhunzawm a ni dawn a, khelmual parukah match 18 a awm dawn. Vawiin hian first round khelh tur la awm bawk mah se match tam zawk hi second round a ni tawh dawn a, champion ngun ber Armed Veng leh champion tawh Kanan inhmachhawn tur hi ngaihven hlawh ber a ni ang.

Nimin khan Kanan hian Samtlang 9-4 in an hneh a, vawiinah an inkhel leh nghal dawn! Kum 2007-a champion Kanan hi tun hma angin an ṭha tawh lo a, chutihrualin an coach Joseph Lalsangzuala hi Mizo coach zinga tawnhriat nei ṭha a ni.

Kanan hian Muallungthu an tlawh hnuin Sairang Dinthar an pan leh dawn a, tlai dar 2:30-ah Armed Veng an hmachhawn ang. Armed Veng coach hi BS-a Colney a ni a, coach pahnih hi MPL-a Mizoram Police enkawl tawh ve ve an ni.

Nikuma neih All Mizoram Inter Village Football-ah khan Armed Veng hian Bungkawn an hneh lo a, vengpum rilru a na. Tun ṭum CYMA Football hi BS-a Colney tan veng mipui rilru na thawi damna hun ṭha a ni ang.

CYMA Football-a RG Stadium-a inkhel bik hi LPS-in an channel LPS1 leh YouTube-ah an live a, football ngainatu tan a man hla hle. Chutihrualin vawiina RG Stadium-a inlan tura ngaihven hlawh bik tia sawi tur a awm lo.

Vawiina inlan tur hrim hrimah erawh nimin lama chiang taka chak Mission Vengthlangin Khawzawl Vengthar lamah fiahna an hmachhawn dawn a; team angin Farkawn Jt., Venghlui leh Khawlailung te inkhel en a châkawm ang.