Reds player pali an chhuak dawn - insiamṭhat hun!

Liverpool chuan Nilaini zan khan season tawp ruala Anfield chhuahsan tur player hming pali an tar chhuak a, an tarchhuah zingah veteran midfielder James Milner a tel.

Milner bakah hian Roberto Firmino, Naby Keita leh Alex Oxlade-Chamberlain chu season tawpa Liverpool chhuahsan tur zingah an tel a, Firmino bik hi season laihawl velah khan Anfield a chhuahsan dawn tih a chiang tawh.

Player pali chhuak turte hi Liverpool-in kum 2019-a Champions League nomawi an chawi leh 2019-20 season a Premier League nomawi an chawi khan squad-ah an tel vek a, Reds-in harhtharna an channa kawngah tha an thawh vek a ni.

Liverpool chuan, "Club tana an hnathawh avanga zah em em leh an chunga lawm em em chungin kan thlah dawn a ni," an ti a, May 28 zana Anfield-a Aston Villa an mikhual hunah player pali thlahna hun hi hman nghal a ni ang.

Innghahna tlak Milner

Kum 37 mi Milner hian June 2015 khan free transfer-in Liverpool hi Manchester City aṭangin a zawm a, hetihlaia Reds manager chu Brendan Rodgers niin, fan-ten a chunga rinna nghah dan tur hriatthiam harsa an ti hle.

Mahse, Jurgen Klopp-a hnuaiah pawh hmun pawimawh chang zuiin, Liverpool tan season riat a khelh meuh chuan match 330 inlan sakin, goal 26 a khung a, assist 46 neiin, a professional career-ah club pakhat tana a match khelh tamna ber a ni.

Liverpool tan Premier League, FA Cup, League Cup, FA Community Shield, Champions League, UEFA Super Cup leh FIFA Club World Cup nomawi te a chawi a, tun season-ah pawh match 41 ngawt a khelhsak leh tawh - Brighton & Hove Albion leh Leeds United nen sawizawm a ni mek.

Si Senor!

Season tawp ruala contract hmang zo tur Firmino hi Liverpool-in chelh duh mah se khelhna hmun chang tam tawh lo forward hian chhuah a thlang zawk a, Brazilian forward duhtu zingah Barcelona leh Juventus hming pawh lam rik a ni.

Kum 31 mi forward hian June 2015 khan Hoffenheim aṭangin Reds hi pound maktaduai 29-in a zawm a, Reds tana a season ṭha bera chhal ngam chu 2017-18 season khan hmangin, match 54-ah goal 27 ngawt a khungsak. Tun season-ah hliam vanga minute a nei tam lo chungin match 33-ah goal 11 a khung a, assist vawi nga a nei bawk.

Reds tan match 360 a khel hman a, goal 109 khungin assist 79 a nei. Premier League, FA Cup, League Cup, FA Community Shield, Champions League, UEFA Super Cup leh FIFA Club World Cup -ah te a champion pui a, Sadio Mane leh Mohamed Salah te nena an inkawp chu Reds chanchina dai tawh ngai lo tur a ni.

Beiseina thamral

August 2017 khan Arsenal-in chelh an duh chung leh, Chelsea-in lakluh ve an tum chungin Alex Oxlade-Chamberlain-a'n Liverpool chu £35mtd-in a zawm a, Reds tana a season hmasa berah hmun pawimawh chang nghal mah se Champions League semifinal-a a hliam na takin a season hnihnaah match hnih bak a khel lo.

English midfielder hi 2019-20 season-ah ṭha takin lo kir leh mah se, season tawp lamah a inhliam leh a, ngai a awh leh tawh lo - Reds tan match 146 khela goal 18 khungin, assist vawi 15 a nei a, Premier League, League Cup, Champions League, UEFA Super Cup leh FIFA Club World Cup-a champion zingah a tel.

August 2017 khan Naby Keita-a'n Liverpool zawm turin contract a ziak a, £48mtd-in July 2018-ah a zawm. Kum 2015-a Steven Gerrard-a'n a kalsan hnua tumah an la haktir leh loh number 8 chu Keita hi pek a ni a, mahse, hliam vanga a talbuai fo avangin beisei a phak lo.

Liverpool tan season nga a khelh chhungin match 129 a khelhsak a, goal 11 khungin assist vawi sarih a nei. Reds tan Premier League, FA Cup, League Cup, FA Community Shield, Champions League, UEFA Super Cup leh FIFA Club World Cup nomawi a chawi.

Hmachhawp

Liverpool boss Jurgen Klopp-a'n nipui transfer-ah theihtawp chhuaha squad thuam chak an tum tur thu a lo sawi tawh a, Reds fan-ten nipui transfer an nghakhlel a nih pawhin a awm lo hran lo.

Firmino chhuak dawn mah se Liverpool hian Cody Gakpo chu thlasik transfer-ah an lalut tawh a, Salah, Diogo Jota, Luis Diaz leh Darwin Nunez an awm bawk avangin tlarhma hi chu an inlei belh a rinawm chiah lo a, tun dinhmuna an inthuam chakna tura rin ber chu midfield lam hi a ni.

Milner, Keita leh Ox an chhuah dawn bakah captain Jordan Henderson chu June hian kum 33 mi a ni tawh dawn. Liverpool hian a man a to em avangin an duh ber Jude Bellingham chu an lei loh tur thu an tichiang tawh a, Chelsea midfielder Mason Mount leh Brighton & Hove Albion midfielder Alexis Mac Allister te hming a ri ring hle.

Tun hnaiah Newcastle United midfielder Bruno Guimaraes hming pawh sawi rik a ni - mahse, Magpies zawkin Champions League an khelh a, Reds-in an khelh phak loh chuan thlem chhuah a harsain a rinawm a, Barcelona leh Paris Saint-Germain te pawhin an duh niin an sawi.