Butler hoin Miami Heat an chak

Jimmy Butler-a point 35 leh assist vawi sarih hmangin Miami Heat chuan Boston Celtics chu 123-116 in an hneh. Heat hian Eastern Conference finals khelh laiah 1-0 in series hma an hruai nghal a ni.

Nimin zing an inkhelhna hi Boston khelmual TD Garden a ni a, season pumpui an hman dan thlir chuan Boston Celtics hi team ṭha leh rinkai zawk an ni. Quarter hmasa pahnih leh a hnuhnung berah pawh an chungnung.

Mahse, quarter pathumna bikah Miami Heat hi 46-25 teh meuhin an sang zawk, mikhual team lamin minute 12 chhunga an thil mak tih hi chakpui nan an hmang, an mumang ramah an cheng chhunzawm zel.

Regular season zawh hnuah Jimmy Butler a khel ṭha tual tual a, a hming lemah 'Play-off Jimmy' an ti hial. Butler chuan, "Ka hming an lam ri ring bik a ni mai thei, ka thawhrah bik erawh a ni hauh lo.

"Ka ṭhiante kha a langsar laiah min dah a, min ringtawkin hna thawh tur ka koa an nghah ngam avangin point ka nei hnem," a ti a, an chakna chu mimal thawhrah ni loin an zavaia tih ṭhat vang a nih thu a sawi.

Miami Heat hi seeded pariatna an ni a, kum 1999 hnu lamah seeded hniam ber ni chunga conference finals khel leh thei hmasa ber an ni. Game 1 an lak avangin an chak dawn tihna erawh a la ni bik lo - Boston Celtics lamin Jayson Tatum hoin thapui nen game 2 an khel ngei ang.