Rawlthar ho hun a thleng - Djokovic

Novak Djokovic chu Holger Rune hneh loin Italian Open quarterfinal-ah a tla, kum 2013 hnu lamah Rome khawpuia tennis inelnaah hian a tlak hma ber ṭum a tawng - a chak loh hnuah Djokovic hian player dangte hun a thleng ve tawh tih a sawi.

Serbian star Djokovic hi kar lehah chuan kum 36 mi a ni mai tawh dawn, a vanglai a pel ve tawh. Nilaini zan inkhelah Danish star, kum 20 mi Rune lakah 6-2, 4-6, 6-2 in a chak lo.

A vawi sarih nan Djokovic hian Italian Open nomawi chawi a beisei a, mahse a tir aṭangin awlsam taka chak a nei lo. May 28 aṭanga khelh tur French Open-ah pawh thil a awlsam dawn lo niin a lang.

Grand Slam vawi 22 champion tawh Djokovic chuan, "Hun rei tak chhung chu ṭhangthar zawkte engtikah nge an rawn inlar ang tih hi kan nghak tawh, tunah chuan chu hun chu a lo thleng tawh mek a ni.

"Thawhṭanni aṭang khan Carlos Alcaraz chu world number 1 a ni leh tawh, ani bakah tunlai player chhuak tharte hian tennis hmuhnawm tak tak an chhawp chhuak, an hun chu a thleng tawh. Tennis tan pawh hei hi a ṭha.

"Mimal tak chuan anmahni elphaka awm zel hi ka tum dawn, hnehna chan leh champion chakin ka la tuihal reng bawk. Chutihrualin tun hma angin kan tum leh duh anga thil kalpui a harsa tawh tih erawh kan pawm a ngai," a ti.

Roger Federer, Rafael Nadal leh Novak Djokovic ten hun rei tak chhung chu tennis khawvel an thunun, an karah hian Andy Murray leh Stan Wawrinka te chuan Grand Slam nomawi pathum ve ve an la ve bawk - player dang zingah nomawi lian tham chawi tam thei an awm lo.

Tunah erawh Federer a chawl tawh a, major title lak hnem lama Djokovic nihrual pui Nadal chu hliam vangin a chawl mek - nizan khan chanchinbu mite a kawm a, a hma hun tur a sawi ang, a thutlukna erawh kan hre hman lo thung.