Nagelsmann-a'n Chelsea a hnar kha a tifuh - agent

Bayern Munich-in coach aṭanga an bân tak Julian Nagelsmann-a agent Volker Struth chuan Nagelsmann-a'n Chelsea a zawm lo chu thutlukna dik a nih thu a sawi a, tun dinhmunah Chelsea chu pan chia a ngaih loh thu a sawi.

Chelsea hian Graham Potter an ban hnu khan English coach hmun ruak luah tur an zawng a, season tawp thleng atan Frank Lampard an ruat hnuah coach nghet ni turin Nagelsmann bakah Luis Enrique leh Mauricio Pochettino te an dawr nawn.

Tunah erawh Mauricio Pochettino hi inremna an neihpui tawh a, Tottenham Hotspur fan-ten an ngainat em em Poch hian an hmelma kumhlun ṭhin Blues hi season thar aṭangin a enkawl ṭan dawn.

Struth chuan, "Bayern-in Nagelsmann an ban khan Chelsea hian rang takin an rawn be nghal a, phone hmangin an inbia a ni. Nagelsmann hian thutlukna tur dik tak a siamah ka ngai a, tun dinhmunah chuan he club hi an buai hle a ni.

"Chu bakah euro maktaduai engemaw zat sengin player an lalut a, hei hian coach tana hmachhawp a tihautak hle. Hei chauh a ni lo, buaina dang tam tak a awm bawk. Kan thu dawn dan chuan Chelsea hian an duh ber chu Nagelsmann hi a ni a, ani hian Stamford Bridge pan hreh lo se Chelsea coach a ni ang," a ti - Poch tan ngaihthlak a nuam lo mai thei!

Mahse, Struth-a thusawi hi a dik kher lo mai thei - Chelsea hian Bayern boss hlui Nagelsmann hi an duh ngei a, mahse, an duhthlan hmasa ber chu a ni lem lo, niin khawthlang media te chuan an tarlang.

Nagelsmann hi Antonio Conte bântu Tottenham Hotspur nen pawh sawi zawm an ni hman a, Spurs hian coach tam tak chhawp chhuakin an zirchiang - a tawpah Nagelsmann hi an duhthlan zingah a tel lo a, Spurs pawh a enkawl lo ang.