Coach ṭha ka ni lo - Bielsa

Uruguay coach thar Marcelo Bielsa chuan coach ṭha zingah a hming lam rik ni ve ṭhin mah se, coach ṭha tak a nih lem loh thu a sawi a, "Coach ṭha tia sawi hlawh turin club lian enkawl ka la nei lo a ni," a ti.

Kum 67 mi coach hian February 2022 khan Leeds United a chhuahsan a, club enkawl nei loa a awm reng hnuah, World Cup 2022 zawh hnua Uruguay coach hna chawlhsantu Diego Alonso a thlak dawn a ni.

Bielsa hian Nilaini khan Uruguay coach a nihna angin media a hmachhawn a, press conference neihna tur hmun a thlen hian media-te chuan amah zahna lantir nan kut bengin an lo lawm a ni.

Mahse, pa dangdai ve tak Bielsa chuan coach ṭha tak anga lawm a phu loh thu sawiin, football khawvela club lian tak tak 20 zinga eng club mah a la enkawl loh thu a sawi!

Argentine coach chuan, "Football-ah hian club lian tia chhal theih 20 vel an awm a, mahse, heng club-ah hian enkawl pakhatmah ka la nei lo a, sawm pawh ka la ni miah lo.

"Khawvela club lian la enkawl miah loin engtin nge coach ṭha zinga mi ka nih theih ang? Coach ropui ka nihzia tilang thei engmah ka nei lo a, coach ṭha zinga chhiar tel tlak ka ni lo," a ti.

Bielsa hian international football bikah chuan Uruguay hma hian Argentina leh Chile a lo enkawl tawh a, Argentine club lar Newell's Old Boys aṭanga coaching ṭanin, Mexican club pahnih Atlas & America, Argentine club Velez Sarsfield, Espanyol, Athletic Bilbao, Olympique de Marseille, Lille leh Leeds United a lo enkawl tawh bawk.

El Loco Bielsa hming lem an pek coach chuan Uruaguay a enkawl tur chungchang sawiin, "He ram team enkawl tur hian thlem ka ngai hran lo a, Uruguay enkawl hi dil tur hial zawk ka ni.

"He team enkawl châkna chhan hi pahnih ka nei. Pakhatnaah chuan Uruguay-in player a neihte vang a ni a, tun hnaia ram tana inlan ṭhin player-te hian min hmin hle. Pahnihnaah chuan ram thawkrim tak national team enkawl hi ka châk a ni," a ti.

Bielsa hian Uruguay senior player ho, Luis Suarez leh Edinson Cavani telin an international hmalam hun atan a titipui tur thu a sawi bawk - player pahnih hi kum 36 an ni ve ve tawh.

Leeds boss hlui Bielsa tan hna hautak hmasa tur chu Copa America 2024 a ni dawn a, South American ramte inelna hi nakkum June thlaah khelh ṭan tur niin, USA chuan a thleng dawn a ni.Coach ṭha ka ni lo - Bielsa