Ram tan Auba a inlan leh dawn si

Chelsea striker Pierre-Emerick Aubameyang chuan an ram Gabon tana inkhelh a chawlhsan thu puang tawh mah se, international football-ah a kir leh dawn a, an ram jersey a ha leh dawn.

Kum 33 mi striker hian May 2022 khan ram tana inkhelh a chawlhsan thu a puang a, Gabon tan hian match 68-ah goal 28 a khung hman. Mahse, kum khat liam dawnah ram tana inlan leh turin thutlukna a siam.

Chelsea-a khelhna hmun chang phak lo Auba hi Gabon president Ali Bongo Ondimba nen an inkawm a, an ram hotu lu berin a ngenna chu ngai pawimawhin, ram tana inlan leh turin thutlukna a siam ta a ni.

Arsenal striker hlui Auba chuan, "Pain a fapa hnena thu a sawi angin a thusawi fing tak takte chu ka ngaithla a ni," tiin an ram hotupa nena an inbiakna chungchang a sawi chhuak.

Gabon hian 2023 Africa Cup of Nations qualification group I-ah hma an hruai mek a, June-a Democratic Republic of Congo an mikhual hunah hnehna an chan chuan match khat khelh tur la nei chungin AFCON atan an tling ang.

Auba hian social media lamah a thutlukna hi tarlangin, "Ni engemaw zat liam taah khan Republic of Gabon president Ali Bongo Ondimba nen kan inkawm a, ani nen kan inkawm hnuah hian kan ram leh coach Patrice Neveu tan koh theih rengin ka awm leh ta a ni," a ti.

Kum 2009-a Gabon tana a match hmasa ber kheltu Auba hi tun hnaiah a tluang lo hle. December 2021 khan Arsenal chuan a captain nihna hlihsakin, thlasik transfer-ah Barcelona a zawm zui.

Mahse, tun nipui transfer bazar-ah khan Chelsea a zawm a, Borussia Dortmund-a amah lo enkawl tawhtu Thomas Tuchel ban zui a nih avangin a tlatlum zui lo.

Blues tan hian tun season-ah inelna hrang hrangah match 21 khelin goal thum chiah a la khung a, Arsenal tan match 163-a goal 92 khung thei striker sulhnu atan chuan a ropui lo hle.

Auba hian nipuiah Chelsea a chhuahsan ngei a rinawm a, a club hlui Barcelona-a kir a duh niin an sawi - Catalan club tan hian match 24-ah goal 13 a khung hman.

La Liga champion Barca hian Auba hi tun season league-a an champion medal chu Auba hi an pek ve tur thu an tichiang tawh - Auba hian Blues a pan hma khan tun season-ah Catalan club tan league-ah minute riat a khel ve hman a ni!