Verona mualah Juve an mualpho An hmahruaina a nghing nghal

Cristiano Ronaldo goal hmangin Juventus chuan hma hruai hmasa mah se an tlarhnung a pawp a, mualneitu Hellas Verona chuan hun tawp dawn lamah goal hnih khungin 2-1 in hnehna an chang let daih.

Juventus hian tun season Serie A match 23 khelh aṭangin point 54 an hmu a, a chung berah an la awm. Mahse, nizan khan Milan derby khelh a ni a, champion tum Inter Milan an chak a nih chuan Juve hi an nihrual chiah ang.

February 5, Nilanini khan Cristiano Ronaldo-a'n kum 35 a tling a, a kum angah chuan player tam zawk an chawl tawh, a la inkhel ho pawh an tha a ṭhum tawh ṭhin hle - Ronaldo erawh player ṭha bik zinga mi a la ni.

Inrinni zan inkhelah chawlhlawk hmain goal a lut lo, second half minute 65-naah Ronaldo hian Rodrigo Bentancur-a throgh ball chu chak taka tlanpuiin amah vengtu defender Amir Rrahmani paltlangin goal hmahruai a khung; league match a khelh hnuhnung 10-ah goal a khung kim vek.

Real Madrid forward hlui Ronaldo hian an goal hnihna khung theihna hun ṭha nei mah se goal ban a tihper hlauh a, winger Douglas Costa khung ngei tur anga lang pawh keeper Marco Silvestri chuan a lo dansak bawk. 

Kum 1994-95 khan Gabriel Batistuta chuan Serie A match 11 chhung a zawnin goal a khung, season hmasa khan Fabio Quagliarella chuan Argentine striker record hi a nih rual, Italian football inelna sang bera goal khung zawn record nih rual turin Ronaldo hian match khat a la hmabak a ni.

Season hmasa khan playoff aṭangin Hellas Verona hi Serie A khel turin an tling a, tunah chuan a zawna season riat champion lai Juventus hnehin parukna dinhmun an luah mek! Mumang rama an chen mekna aṭangin harh chhuah an duh rih lo ang.

Goal an phurh hnuah Verona an chiai duh bik lo, Liverpool forward hlui Fabio Borini-a'n an si phurh a sut a, hun tawp nan minute li chauh a awm tawh tihah Marash Kumbulla-a ball tauh chuan Leonardo Bonucci ban a fuh vangin penalty an hlawh.

Verona striker Giampaolo Pazzini-a'n keeper Wojciech Szczesny dan theih lohin chakna goal a khung. Verona hian inkhel tir lamah Kumbulla hmangin goal khung mah se video assistant referee hmanga hnawlsak an ni a, hun tawp dawnah erawh VAR hman a nih hnuah penalty an hmu ve thung.

Italian champion lakah Verona an huaisen a, goal hnih an khung bakah hian Marco Davide Faraoni-a pet chu bar chung chiahah a liam a, Matteo Pessina-a volley chu goal ban hrulah a kal bakah Amir Rrahmani-a pet kum ṭha tak pawh Szczesny-a'n a lo dang hman hlauh.

An chak lo a, an hmahruaina a nghin bawk avangin Juventus manager Maurizio Sarri a lawm lo a, insiamṭhat an mamawh thu a sawi. Sarri chuan, "Allianz Stadium-ah chuan hnehna kan chang mai ṭhin, khualmualah erawh chetsual kan ching hle.

"Point kan hloh fo a nih chuan nomawi hum loh palh theih a ni. Tun inkhel bikah khan Verona khan hnehna chan an phu, keini lam hian chhuanlam tur zawng buai loa insiamṭhat nghal kan mamawh," tiin a sawi.

Turin club hian Giorgio Chiellini, Merih Demiral, Danilo, Federico Bernardeschi leh Sami Khedira te chu hliam vangin an chhawr thei lo a, manager thar Sarri kaihhruaina hnuaiah beisei angin Serie A an thunun thei rih lo.

Verona manager Ivan Juric chuan, "Juventus hneh tur chuan kan thinlung kan hlan a ngai a, tun ṭumah khan kan theihna leh rilru zawng zawng chu inkhelah kan pek avangin point thum kan hmu," a ti. Juve lakah hian vawi 11 an tlawm tawh a, vawi hnih an hnehna chiah a ni ve thung.