Alemany-a'n Barca chhuahsan lo mai thei

Barcelona director of football Mateu Alemany chuan Catalan club chhuahsanin, Aston Villa a zawm dawn nia sawi awm mah se Alemany hi Nou Camp-a cham chhunzawm thei dinhmunah a din thu khawthlang media-te chuan an tarlang.

Alemany hian Barcelona-ah kum khat dang contract la nei mah se Villa-in sum tam tham tak hlawh tura an sawm avangin Premier League club zawm a tum hman a, Villa boss hi Unai Emery a nih bawk avangin thawk dun thei viau tura ngaih an ni.

Mahse, Barcelona chhungkaw mi, a hming tarlan loh chuan Barca president Joan Laporta leh Alemany hi tun hnaiah an inbiak thu a sawi a, Alemany hian a contract neih lai hman zawh hi a pawi ti lo niin an sawi.

Alemany hian football khawvelah tawnhriat a nei ṭha hle. La Liga club langsar Valencia-ah general director lo ni tawhin, Real Mallorca-ah President leh Chief Executive dinhmun a lo chelh tawh bawk.

Villa head coach Emery-a personal assistant Damia Vidagany hi Valencia-a Alemany nena lo thawk dun tawh an ni a, Alemany hian kar hmasa khan Villa training ground thlengin a tlawh hman.

Real Madrid attacking midfielder Marco Asensio thlengin Villa hi sawi zawm an ni hman a, mahse, Alemany hian a zawm leh lo a nih chuan transfer bazar-a an thawm pawh hi beisei angin a na leh kher lo mai thei.

Hetihlai hian La Liga champion Barcelona sporting director Jordi Cruyff chuan season tawp rualin Catalan club hi a chhuahsan dawn a, a hmun ruak luah turin Barca player hlui Deco hming lam rik mek a ni.