Thla riat atan Toney an hrem!

Brentford striker Ivan Toney chuan England rama football thuneitu sang Football Association (FA) dan phal lohin pawisa thapnaah a inhnamhnawih a, hei vang hian thla riat chhung atan kum 2024 January 17 thleng chu a inkhel thei lo tura hrem a ni.

Toney hi inkhel thei lo tura hrem a nih bakah pawisa £50,000 chawitir a ni, dan a bawhchhiat zat hi 232 zet a tling. Hremna ang chuan kumin September 17 aṭangin Brentford training chu a zawm thei thung ang.

Kum 27 mi Toney hian season duhawm a hmang mek. Brentford tan tun season Premier League match 33 a khelh aṭangin goal 20 a khung a, a team hi table-ah pakuana a nihpui mek.

Hrem a nih avang hian tun season chhunga an khelh hmabak Tottenham Hotspur leh Manchester City te a hmachhawn thei dawn lo a ni.

Brentford chuan FA hian ziaka thu chhuah an siam hun an nghak a, chumi hnuah chuan hmalak dan tur an ngaihtuah tur thu an sawi. Toney pawhin pawi a tih thu leh tunah chuan sawi thui tur a neih loh thu a sawi ve bawk.