CYMA Football-a record nei ṭha Electric Veng inlan ni

LBS Suzuki 21st Inter Branch YMA Football Tournament-ah vawiin hian vawi thum champion tawh Electric Veng an inlan dawn a, chhun dar 11:30 hian Lammualah Rangvamual an hmachhawn ang.

Vawiin hian 1st Bn MAP Ground (Armed Veng), MSSC Ground (Muallungthu) leh RG Stadium (Mualpui) te a remchang dawn lo a, MZU Ground-ah an khel tel thung ang. Ground pali chauha an khelh dawn avangin match 12 a awm dawn.

Kum 20 liam ta

CYMA Football record thlir kir chuan Armed Vengin record an nei ṭha ber a a, dawttu chu Electric Veng an ni. Vawi thum champion tawh Electric Veng hian final vawi thum an thlen ṭumah hnehna an chan vek.

Kum 1987 khan Electric Veng hi Laldingngheta (PaDinga) hoin an champion a, kum 1989-ah nomawi chawi lehin kum 1998-ah Armed Veng hnehin an champion leh bawk. An champion hnuhnun bera captain Lallungmuana hi nomawi vawi thum a chawi ṭumah hian a tel vek.

Electric Veng hian kum 2000 hnu lamah hlawhtlinna ṭhahnem tak chawi mah se CYMA Football-ah an champion tawh lo a, MPL club nei thei Electric Veng mipuiin an hrang hlui Muanzova Khiangte, Benjamin Zonunsiama (L), Laldawngliana (L) Zarthanṭhuama (L), MS Dawngliana (Patea) leh Zorammawia te vanglai an ngai ṭhin ngei ang.

Electric Veng hun?

Electric Veng hian tun hnaiah CYMA Football-ah nomawi chawi tawh lo mah se an tlahniam duai tihna a ni lo a, kum 2010 khan Red Ribbon Football 2012-ah champion-in sial leh nuai khat an dawng.

Tun hnuah pawh Electric Veng hian MPL club an neih avangin team ṭha zinga mi an ni zel a, amaherawhchu tun hma boruak ang kha an pha ta lo deuh. Tun ṭumah hian Electric Vengin nomawi chawi ngei tumin inelna an hmachhawn dawn a, fixtures thlirin round of 32 thleng turin harsatna an neih a rinawm lo.

Inkhel tur dang

Lammualah Mission Veng leh College Veng te an inlan dawn a, team pahnih hi champion rinkai tia sawi rem chiah lo mah se team ṭha zinga mi ni tura ngaih an ni.

MZU Ground-ah veng inelna apianga team ṭha pawl ni phak Bawngkawn an inlan dawn a, Aizawl FC leh Chanmari FC coach hlui K. Malsawmkima'n (Mala) a enkawl dawn.

Ramhlun Sports Complex-in first match-ah North Lungleng 8-0 ngawtin an sawp a, Bairabi Jt lakah fiahna hautak zawk a hmachhawn ang.

MFA Ground, Sairang Dintharah 2004 champion Ramthar an inlan dawn a, Ramhlun Venglai an hmachhawn dawn. Ramthar hi team vantlang pawl tak an ni pha zel. MPL club nei Venghnuai pawhin Mamit Hmar Veng lakah an theihna lantir an tum dawn a ni.