Tuin nge Champions League khel dawn?

Premier League-ah champion a chiang tawh, tiin a sawi ngam a, tuna 'hot' ber chu Champions League khel tur inchuh boruak a ni - Manchester City leh Arsenal chu European football-a club inelna sang ber khel tur chiang an ni a, hmun ruak pahnih a la awm.

He hmun ruak pahnih hi Newcastle United, Manchester United leh Liverpool ten an inchuh mek a, tun dinhmuna khelh lohna chance sang ber chu Liverpool an ni - kartawp inkhelah United leh Liverpool an inlan ve ve dawn.

Manchester United hian khualmualah Bournemouth chu zanin dar 7:30 hian an lenchilh dawn a, zan dar 7:30-ah vek Liverpool chuan Aston Villa an mikhual bawk ang.

Newcastle United erawh Ningani zan khan inlanin, Brighton & Hove Albion chu 4-1 in an sawp a, Champions League rim an hre ṭan - Thawhṭanni zan dar 12:30-ah Leicester City mikhualin an inlan ve leh chauh dawn.

Newcastle beiseina

Magpies-in 4-1 in Brighton an sawp a, Deniz Undav (own goal), Dan Burn, Callum Wilson leh Bruno Guimarães ten goal khat ṭheuh an khung a, mikhual team tan Undav chuan a tihsual thup mawiin goal khung ve leh mah se awmzia a nei phak lo.

Newcastle-in hnehna an chan avangin Champions League khel phak turin match hnih khelh hmabakah vawi khat chak chiah an mamawh tawh a, he team hian European football an khel a nih ngat chuan sum an neih bawk avangin season tharah an hlauhawm leh zual ang.

Eddie Howe-a naute hian Thawhṭanni zanah tlak hlau Leicester City an mikhual ang a, May 28 zanah Chelsea an lenchilh dawn bawk - chetsual theih ve vena team an ni a, chutihrual chuan tun hnaia team pahnih khelh dan enin Magpies tan beiseina a sang hle.

United an derthawng?

Manchester United-in match thum khelh tur an la nei a, Champions League khel chiang turin match hnihah chak an mamawh - match thum aṭang hian point li hlawh chhuak ta se, Liverpool-in an hmabak match hnihah hnehna chang ve ve bawk se, Reds-in point khata hmu sangin an tlang ang.

United hian match thum aṭangin point nga nei ta se, Liverpool nen 71 ve ve an nei ang a, goal difference-a dinhmun ṭha fal zawk Liverpool-in Champions League an khel thung ang - a tawi zawnga sawi chuan Newcastle aiin United dinhmun a ṭha lo zawk.

Red Devils hian zanin dar 7:30-ah Bournemouth an lenchilh dawn a, chak ngei ngei an mamawh. A chhan maw? A hnua an hmachhawn leh tur hi Chelsea leh tun hnaia che ṭha tak Fulham an ni a, chetsual theihna ve ve an ni.

Beiseina tlem

Champions League khelh tum team pathum zinga dinhmun chhe bera chhal ngam chu Liverpool an ni - an hmabak match hnihah chak ve ve pawh ni se, Magpies emaw United emaw an chesual a nih loh chuan Champions League an khel dawn chuang lo.

A tawi zawnga sawi chuan, Liverpool hi an elpuite kutah an innghat tel. Mahse, chuvang ngawta hnual a rem lo a, Reds manager Jurgen Klopp chuan, "Kan tan chance a tlem tawh a, mahse, an chetsual hlauh a, chance lo la tura kan awm a ngai a ni," a ti.

Liverpool hian zaninah Aston Villa an mikhual dawn a, May 28 zanah Southampton an lenchilh leh ang - he team hian Champions League khelh an tum chuan tlawm a thiang lo a, a zawna league match sarih chak tawh team hian match kuaah an pawhsei a ngai.

Mahse, Liverpool tan chanchin lawmawm lo a awm a, an coach Jurgen Klopp chuan zaninah hian hrem vangin a ho thei dawn lo - German coach uapna tel loa khelh hi an tan a harsain a rinawm.

Hremna chu

April thla khan Liverpool hian game 'hot' takah Tottenham Hotspur chu 4-3 in an hneh a, inkhelh zawhah Klopp chuan na taka referee Paul Tierney sawiselin, "Min huatna a nei a ni ang," a ti hial. Klopp hian hun pek belha an chakna goal chu fourth official hmaah a lawm bawk a, referee Tierney chuan mawi hnai lo takin a ṭawngkhum niin a sawi bawk. Mahse, a hnuah Klopp hian ngaihdam a dil.

German coach hi £75,000 chawitir a ni bawk a, Manchester City nen an inkhelh ṭuma hnawhchhuah a nih hnua match khat hrem tawk tawh bawk Klopp hian match hnih hrem a nihnaah hian match khat chiah a hmang dawn thung.

Match khat dang hi 2023-24 season thleng a nung ang a, hrem ngaia a awm leh a nih loh chuan lek kawh a ni lo ang - chumi awmzia chu zaninah Villa khelmualah a awm lo ang a, Saints lakah a awm dawn thung.