French Open khel lo tur Nadal

Rafael Nadal chuan hliam vangin French Open a khel thei dawn lo tih a puang chiang. Clay court inelna lian leh ngaihhlut berah hian kum 19 hnua a vawi khat nan a hmel a inlan thei dawn lo tihna a ni.

Grand Slam nomawi 22 la tawh Nadal hian Paris khawpuiah bik ṭum 14 ngawt nomawi a chawi tawh, a inlan lo tur hi channa lian tak a ni ngei ang - ruahman dan chuan season khat bak tennis khelh theih a beisei tawh lo tih a sawi bawk.

Kum 36 mi Nadal chuan, "Thutlukna hi ka duh anga siam a ni lo, ka taksa zawkin thutlukna a siam. Tun dinhmunah ka tan Roland Garros khelh chu thil theih a ni lo. Ka ruahman dan chuan season thar chauh chu tennis khelh theih ka la beisei," tiin tun season-ah chawlh a la tum lo.

Roland Garros-ah bik hian Nadal-a'n match 115 a khelh zinga vawi 112 zetah hnehna a chang thei a, kuminah pawh inlan ni se la chuan champion tura rinkai zinga mi pawh a ni leh ngei ang.

Mahse, Australian Open khelh lai khan Nadal hi a khel bawr a hliam a, a hliam vang hian tun thlengin a la inkhel leh thei rih lo. Tunah chuan engtik hunah nge a lo kir dawn tih pawh sawi theih a ni ta rih lo.

Nadal chuan, "Tun hnai thla li chhung chu ni tin mai hian eng emaw zawng talin hma ka sawn em tih ka inen ṭhin. Training zangkhai zawkte pawh ka nei thei, amaherawhchu tournament khel tur chuan ka la inpeih lo," a ti.

Indian Wells, Miami Masters, Madrid Open, Barcelona Open leh Italian Open aṭangin tun hnaiah a inhnukdawk a, tennis khawvel chuan French Open atan chuan a lo kir hram an beisei, mahse mi tam takin an beiseina chu a thamral rih dawn ta.

Roland-Garros Tournament director Amelie Mauresmo chuan, "Rafael Nadal leh Roland-Garros hi chu a inzawm tlat a, ani a tel thei lo tur tih hriat meuh chu a lungchhiat thlak khawp mai, nakkumah chuan kan inhmuh theih ngei ka beisei," a ti.

Major title lak hnem lamah Nadal (22) leh Novak Djokovic te an intluk tawk mek. Serbian star pawh hian kar tharah chuan kum 36 a tling tawh dawn a, tun thla tawpa khelh tur French Open erawh a inlan theih a beiseiawm thung.

Tun hnai khan Djokovic chuan tennis chu ṭhangtharte khawvel a ni chho tawh tih a sawi a, a thusawi hi a takin a thleng dik chho mek ni pawhin a lang. Roger Federer, Nadal leh Djokovic te hun a herliam mek.