Europa League final khel tur Roma leh Sevilla

Jose Mourinho enkawl AS Roma chuan Bayer Leverkusen lakah an goal an venghim tluan thei a, an tum ram an thleng. Italian club hian Europa League final-ah Sevilla an hmachhawn ang.

Europa League semifinal first leg-ah Roma hian Edoardo Bove-a goal khat hmangin hnehna an chang, second leg-ah goal khung belh loin German club lakah an chak tlang a ni.

Semifinal lehlamah Sevilla chuan an mikhual Juventus chu 2-1 in an hneh, inkhel hmasa nen belhkhawmin Spanish club hi 3-2 in an tlang. Vawi ruk champion tawh hian a vawi sarih nan nomawi chawi ngei an tum ang.

Roma an tlang

Mourinho hian an chak theihna tur a nih chuan mahni goal venhim ngawr ngawr a pawi ti ngai lo. Leverkusen lakah pawh ball possession 29% chauh an nei a, goal khung tuma vawi khat an pet chu goal zawnah a la kal lo zui.

Mahse, an tumah an chiangin an hlawhtling tlat. Season hmasa khan Europa Conference League nomawi an chawi tawh a, a kum zawnin Serie A club hian European football-ah final an khel dawn.

Roma manager Mourinho chuan, "Ka thil tum chu Roma thawnthua mi pawimawh nih phak a ni. Rome khawpui hian football an ngaina em em a, an naupang ten football an atchilh tih pawh ka hrechiang.

"He hmun ka pan tirh ni aṭang khan thlawpna ka dawng ṭha, kawng engkimah hma kan sawn ni pawhin ka hria. He khawpui hian a phu ang ngeiin sulhnu ropui leh chhinchhiah tlak bik nei se ka duh," a ti.

Portuguese manager hian European football bikah a team enkawl vawi nga final a khelhpui tawh a, a la chak vek. Roma hma hian Porto, Inter Milan leh Manchester United te chu Europe-ah a lo hlawhtlinpui tawh.

Sevilla an tlang

Europa League a nih tawh chuan Sevilla boruak a danglam ṭhin, vawi ruk champion tawh hian team lian zawka ngaih Juventus an pet chhuak leh ta, an match hmasa lamah Manchester United an lo hnawt chhuak tawh bawk.

Allianz Stadium-ah 1-1 in an inhnehtawk tawh. Ramon Sanchez-Pizjuan Stadium-ah mikhual team lamin Dusan Vlahovic hmangin goal an nei hmasa, mahse Old Lady hian goal an neih aṭanga minute ruk hnuah goal an chhuah ve leh nghal.

Suso-a'n a ke vei lam hmangin mawi zetin siphurh a sut a, hun pangngaiah inhnehtawkin extra time khelh a ni. Spanish club tan Bryan Gil-a siamsak chu Erik Lamela-a'n chakna goal atan a khung, hun tawp dawna defender Marcos Acuna hnawhchhuahin awmzia a nei phak tawh lo.

Sevilla captain Jesus Navas chuan, "A makin a ropui ngei mai, tun hi hnehna kan chan avanga lawm hun chu a ni. Fans kan nei ṭha em em a, a tir aṭanga a tawp thleng khan kan chakna hnar pawimawh tak an ni chiang hle," a ti.

Chak lo Juventus erawhin tun season chu nomawi an chawi dawn lo. Serie A lamah erawh point 15 pek let an nih avangin season thara Champions League khel turin an dinhmun a ṭha a, coach Massimiliano Allegri tan erawh UCL ticket chauh chu hlawhtlinna a ni phak lo.