IPL Playoff khel tur a chiang dawn ta
Cricket inelnaa sum tamna ber Indian Premeir League-a playoff khel tur chu tunkar tawp hian a chiang dawn. League round hi May 21, Pathianni zanah khelh zawk vek a ni ang.
May 18, Ningani zan khan Royal Challengers Bangalore-in Sunrisers Hyderabad an hneh a, Virat Kohli telna team tan playoff khelhna kawng a inhawng zau hle. Chutihrualin kartawp inkhel turah hian playoff khelh tum hoin tlin tumten beisei nei tur nei lo leh tling tawh an hmachhawn dawn a, a boruak san tur angin a sang thei dawn lo.
CSK leh LSG
Chennai Super Kings-in vawiin tlai dar 3:30 hian tla tawh Delhi Capitals an hmachhawn dawn a, hnehna an chang a nih chuan playoff an khelh chian dawn bakah qualfier 1 khel tur pawhin an dinhmun a ṭha.
MS Dhoni captain-na hnuaia khel CSK hi an kutah engkim awm mah se an chak lo erawh chuan playoff khel lo thei an la ni tho. Hei tak hi a boruak sanna tur a ni a, Delhi hian playoff khelh beiseina an neih loh hnuah Punjab Kings an hneh. Chennai tan a fimkhur a ṭul ang.
Lucknow Super Giants hian tla tawh Kolkata Knight Riders chu Eden Gardens-ah an hmachhawn dawn a, tun season-a an vawi khat inkhelhna tur a ni. LSG hian an match hnuhnung berah Mumbai Indians an hneh a, KKR laka hnehna an chang a nih chuan playoff an an khel dawn. An kutah engkim a awm.
RCB leh MI
Royal Challengers Bangalore-in beiseina an neih theih nan Virat Kohli-a'n century a siam a, Sunrisers Hyderabad wicket riatin an hneh. Bangalore hian hnehna an chan avangin an kutah engkim a awm a, mahse May 21, Pathianni zana an hmachhawn tur hi champion leh pakhatna dinhmun luahtu Gujarat Titans te an ni.
Mumbai Indians-in season chawhnu lam hmang ṭha mah se match hnuhnung bera Lucknow an hneh loh an tuar a, midang result-ah an innghah a ngaih phah. Mumbai Indians hian May 21, Pathianni tlai dar 3:30-ah tla tawh Sunrisers Hyderabad an hmachhawn ang.
Inelna kalphung
IPL-ah hian team 10 an tel a, league round-ah hian vawi 14 ṭheuh khelh tur a ni. Team tin hi vawi khat ṭheuh an inkhel chhuak vek a, hei bakah hian team 10 hi group hnihah ṭhenin an group-a awm team hi vawi khat ṭheuh an hmachhawn leh bawk.
A sang paliin playoff hi an khel dawn a, chutihrualin dinhmun a zirin hamṭhatna a awm. League round-a pakhatna leh pahnihna hian qualifier 1 an khel dawn a, pathumna leh palinaten eliminator an khel thung dawn.
Qualifier 1-a chak zawk hian final an lut nghal a, chak lo zawk pawhin eliminator-a chak zawk nen final khel tur an zawng leh dawn. Eliminator-a chak lo erawh an tla nghal, hei vang hian qualifier 1 khelh phak hi a pawimawh hle.