European final khel tur West Ham

West Ham tan European football-a champion nomawi chawi leh turin match khat chak chiah a ngai ta - Hammers hian Ningani zan khan Europa Conference League semifinal second leg-ah AZ Alkmaar chu 1-0 in an hneh.

Hammers tan Pablo Fornals chuan hun pek belhah inkhela goal awmchhun hi a khung a, first leg-ah 2-1 a hnehna an lo chan tawh bawk avangin inkhel pahnih belhkhawmah 3-1 in an chak.

Semifinal inkhel dangah Fiorentina chuan 3-1 in FC Basel an hneh a, first leg-ah 2-1 in tlawm mah se inkhel pahnih belhkhawmah 4-3 in an chak - final an lut.

Fiorentina tan Nicolás González chuan goal hnih khungin, Antonín Barák chuan goal khat a thawh bawk - Basel tana Mohamed Zeki Amdouni goal khungin awmzia a nei phak lo.

A hunah tak

West Ham-in European football inelna lianthama final an khelh hnuhnung ber chu 1975-76 Cup Winners' Cup kha a ni a, Anderlecht lakah 4-2 in an tlawm. Season hmasaah Europa League semifinal an lut a, mahse, champion zui ta Eintracht Frankfurt lakah tlawmin final an lut phak lo.

ECL semifinal khelh hmain coach David Moyes-a'n final an luh chuan a coaching career-a a thil tawn ropui ber a nih tur thu a sawi a, a duhthusam ram chu a thleng dik ta -

AZ khelmualah an chak a, hun pek belh minute linaah Fornals chuan goal awmchhun a khung.

Hammers hi an vanneih zan ni se, goal tam zawk khung thei an ni - Lucas Paqueta-a'n uiawm takin post a tihper a, captain Declan Rice-a chance neih chu AZ keeper Mat Ryan chuan ṭha zetin a dansak a, Nayef Aguerd pawhin a chance neih a chhawr lo.

A tawpah erawh Fornals a inlar a, goal an khung dawn tawh lo emaw tih hnuah chak a nemnghet. Kum 1965-a Cup Winners' Cup nomawi an chawi hnua a vawi khat nan European football inelna lianthama champion thei dinhmunah an ding mek.

Buaina ral

AZ khelmualah Dutch team ṭantuten West Ham player chhungte awmna lam panin buaina an siam a, Hammers player ṭhenkhat chu an chhungte chhanhim tumin buainaah hian an inhnamhnawih.

Moyes chuan, "Eng chiah nge thleng hre turin kan nghah deuh a la ngai a, a pawi ber chu buaina an siamna kha players chhungte awmna lam a ni kha a ni," a ti a, Moyes-a pa kum 87 mi pawhin a hmunah inkhel hi a en.

UFEA chuan hremna an tihchhuah hmain thil thleng hi an zirchiang phawt ang. London Stadium-a an intawn hmasak ṭum khan AZ players chhungte leh Hammers fan-te an lo intibuai tawh bawk.

AZ boss Pascal Jansen chuan, "Kar hmasaa thil thleng kha a lawmawm lo a, tunah a thleng leh ta. Kan khelmuala hetiang a thleng hi ka zak hle a, mahse, insum a ngai si a ni," tiin an fan-te a dem.

Fiorentina an tho

Fiorentina-in first leg-ah rin loh takin Basel an ngam lo a, second leg-ah erawh 3-1 in an chak - minute 35-na lekah mikhual team hian Nicolás González hmangin goal hmahruai an khung a, Basel-in Amdouni hmangin an chhanglet.

Hetiang hian inkhel tawp ta se, Basel hi 3-2 a tlang tur an ni. Mahse, Nicolás González hian minute 72-naah khung lehin, 3-3 a ni a, extra time khelh a ni.

Goal dang a lut lawk lo. Mahse, extra time-ah pawh hun pek belh minute kuanaah Antonín Barák chuan Fiorentina tan a khung a, aggregate-ah 4-3 in Italian club an chak.

Fiorentina-in final an lut a, June 7, zan dar 12:30-ah West Ham nen champion nomawi an inchuh ang.