Barcelona-in champion nomawi chawi dawn

Spanish La Liga champion Barcelona chuan Inrinni zan hian La Liga nomawi an dawng tawh dawn a, he thu hi Spanish infiamna chanchinbu lar Mundo Deportivo chuan an tarlang a ni - he thu buatsaih a nih lai hian La Liga leh Barcelona aṭangin thuthar a la awm lo thung.

Catalan club hian zanin dar 12:30 hian league match khel turin Real Sociedad an mikhual dawn a, Nou Camp-ah ngei champion nomawi hi hlan an ni dawn - Catalan club hian kar hmasa khan league-ah Espanyol chu 4-2 in an hneh a, an champion.

Mahse, khualmuala inlan an nih avangin nomawi chawi a rem lo a, Deportivo chuan zaninah hian hlan an ni dawn ta niin an tarlang - Real Sociedad hi table-ah palina an ni mek a, season thara Champions League khelh tum an nih avangin a awlsam dawn lo.

Barca tan Sociedad hi hneh loh theih an ni a, chutihrual chuan chak zawh loh hnua nomawi chawi hi a nuam dawn lo - champion tawh mah se coach Xavi-a'n a player neih ṭhat berte nen Sociedad hi a lo mikhual a rinawm.

Catalan club hian league match li khelh tur an la hmabak a, zaninah nomawi hi pek an nih loh pawhin, May 28 zana Real Mallorca an mikhual hunah chuan pek an ni ang - Sociedad leh Mallorca bakah hian Real Valladolid leh Celta Vigo chu hmachhawn tur an la neih an ni a, anni hi khualmualah an tawng ve ve dawn thung.