May 25-ah MFA Golden Jubilee lawm dawn; AIFF Secretary General-in a hmanpui ang

Mizoram Football Association chuan May 25, 2023 zan hian Vanapa Hall-ah Golden Jubilee a lawm dawn a, All India Football Federation Secretary General Dr Shaji Prabhakaran chu he hun hmang tur hian Aizawlah a rawn kal ang.

MFA hi 1973 khan din a ni a, kumin hi kum 50-na niin kum tluanin he Golden Jubilee hi lawm tura duan a ni. A hunpui ber chu May 25, Ningani hian lawm a ni ang.

MFA Golden Jubilee-ah hian MFA chuan Mizoram aiawha football khel tawh zawng zawng leh MFA hruaitu hluite chu tel ṭheuh turin a sawm a ni.

Hruaitu & Player hluite

MFA President hmasa ber chu Lal Thanhawla a ni a, hemi hnu hian president panga - Rosangliana, K. Liantlinga, PC Vanlalhruaia, J. Lalhmingliana leh Lal Thanzara-te an awm tawh a, an zavai hian an la dam kim vek.

MFA chuan kum 50-na a lawm hunah hian Office Bearer leh Executive Committee member ni tawh zawng zawng kal ṭheuh turin a sawm a, insawm kim sen a harsat deuh avangin lam hmaih palh a awm pawhin he thuchhuah hi sawmnaa pawmsak turin an ngen.

Kum 1973 leh 2023 inkara Mizoram aiawha khel tawh, mipa leh hmeichhe player zawng zawng chu tel vek turin MFA hian a sawm a ni. Kum 50 chhunga sub junior, junior leh senior-a khelte chu kal turin an ngen a ni.

Chawimawina hlan dawn

MFA Golden Jubilee-ah hian India senior international player ni tawh zawng zawngte chawimawina hlan an ni dawn a, hei bakah hian Mizoram aṭanga AIFF hnuaia kawng hrang hranga a hmasa berte hnenah chawimawina pek a ni ang.

Hei bakah hian AIFF hnuaia champion team ni hmasa ber ṭheuh - National Sub Junior Boys Champion - 2003; National Junior Boys Champion - 2013; Santosh Trophy - 2014; I League Champion, Aizawl FC - 2017; National Sub Junior Girls Champion - 2015 bakah National Games Men's Champion - 2015 team hnenah chawimawina hlan an ni ang.

Hun hman dan tur

A lawmna pui ber May 25, Ningani zan hi chi hniha duan a ni. Zan dar 7-7:50 inkar hi player leh hruaitu hluite inhmelhriattirna, thlalak leh thingpui in hun a ni dawn. Vanapa Hall-ah Mizoram football-a lo tel tawh player leh hruaitute inhmunkhawm hun runpui hman a ni ang.

Dar 8:00-ah Golden Jubilee lawmna hun ṭan a ni dawn a, AIFF Secretary General leh MFA hruaitute'n thu an sawi dawn bakah chawimawina hun hman a ni ang a, zaithiam zai ngaihthlak a ni bawk ang. He hun hi football inkhelh hun chhung - minute 90 chhung hman tum a ni.